ACREMILES

請拖動或輸入金額

HK$

拉桿去到盡係 HK$300,000+；更大額（上限 HK$10,000,000）直接喺數字欄入。改完會即刻自動計，唔使撳掣。輸入資料預設只存喺你部機；儲存做計劃並登入 Google 先會備份。

恭喜！你可以賺大約

0 里

約 – 里（估算範圍，唔係精確數字）

–

需新申請

–

每賺 1 里需簽賬

你嘅推薦卡組合

令個方案更啱你

首年年費容許首年要付年費嘅卡入組合（預設關閉）

一個人申請，定二人家庭？

二人家庭＝兩位都申請卡，同一張卡嘅迎新可以各食一份；系統會分開兩個 section 計，最後畀埋家庭合計。

你嘅年薪（可選）

HK$

唔填都計到；填咗只用嚟隔走年薪門檻較高嘅卡，而且只存本機。批核仍以銀行為準。

呢筆錢會點洗？

一炮過（買錶、買車、一次過畀清）＝一日簽晒，抵率有上限嘅卡淨計一個月／一季上限，容易爆頂；分幾個月（婚禮訂金、裝修分期）＝可以攤開，貼住上限計。分幾個月嘅情況，系統以約 6 個月攤開估算上限。

想儲邊種里數？

每次只會按你揀嘅Programme計，唔會將Asia Miles、Avios、ANA、United、FlyMore或Fortune Wings Club混成同一個總數；「AM／Avios都睇」會分開計兩個方案。

每人最多開幾多張新卡？

開得多迎新多，但每次申請都可能涉及銀行信貸審批。系統預設唔設每月張數上限；如你另有節奏要求，先用可選規劃參數限制。

已經有嘅卡

已持有同一銀行信用卡、過往領取迎新，都可能影響資格——剔走唔適用嘅卡，總數會即時重計。

你現時持有邊間發卡機構嘅信用卡？

包括未列喺上面清單嘅卡。用嚟判斷你係咪同一銀行嘅現有客：如果官方冇明文寫現有客都有迎新，同機構第二張會當冇迎新計，唔會靠估。

你確認符合邊張Part A卡嘅官方迎新資格？

預設一張都唔會假設。逐張確認代表你已核對該卡新客定義、冷河、必要登記、獎賞選項及申請資格；未確認只留喺Candidate Pool，唔會進確定結果。

額外條件（只喺你確實符合時選）

呢啲條件會即時改變相關卡嘅可計層級、年費或基本賺率；第三方加碼、抽獎、現金及實物獎賞永遠唔會因呢度選擇而變成保證里數。

查看申請時間表

可以換到乜？（示範參考）

按各卡現行官方條款計算

呢幾張卡平時仲可以點用？食飯・網購・本地・海外——用返上面推薦嘅卡計一年儲到幾多

一個人計，定二人家庭？

呢度儲緊邊種里數？

你手上有邊幾張卡？

你每月大約使幾多？（唔使精確）

瀏覽完整信用卡資料庫唔使睇都可以用——呢度只係畀你查證資料嚟源

里數計劃

你有幾多 Asia Miles？

里

兩個計劃嘅結餘分開記住，任何時候唔會夾埋；轉計劃就見返嗰邊上次填嘅數。環球票只計 Asia Miles。

里數需求按已核實官方資料估算；實際放位同稅費以出票頁為準。

資料來源與計算說明 ▾

✅ 國泰標準獎勵（單程／來回）、升艙同寰宇一家環球票嘅里數，已逐格對官方核實（2026-07-11：官方計算機＋官方換算表＋官方 T&C）。Avios 數字、現金稅費同其他參考項目仍未核實——實際換票前，上國泰 Asia Miles／英航 Executive Club 官網確認放位同稅費。

旅客人數

1 人

最少 1 人，最多 7 人；改人數後所有里數結果會即時更新。

單程／來回計算機 · 國泰標準獎勵

香港 ⇄ 目的地，換國泰航空自己航班要幾多里。全部數字經官方核實（2026-07-11）：揀大區、撳目的地，四個艙即刻出。

想飛去邊？揀大區，撳目的地

來源（全部官方，2026-07-11）：24 格里數＝官方計算機逐格查證（單程；來回＝×2 已交叉核對）；距離區間＋類別1/2 國家分界＝國泰官方「修訂飛行距離區域」頁；大圓距離＝官方標準獎勵條款第 3 條明文計法。呢張表淨係換國泰自營航班——日航／英航等 oneworld 夥伴係另一套（睇「環球票」子頁或官方夥伴獎勵）。里數以外仲要畀 YQ＋稅費現金。
國泰官方兌換頁 ↗

一張票飛幾大洲——簡易定進階？

簡易：輸入或揀你想去嘅地方同活動，配對現有已核實示範路線。進階：直接用航段、停留、開口檢查器自己砌。

想環遊世界，飛足五個城市？

邊有人仲逐程買機票架～用 Asia Miles 一次過換一張寰宇一家環球票，5 個目的地 + 橫跨幾大洲。商務艙約 250,000 里起。

規矩有啲複雜，所以我做咗呢個規劃器。揀好目的地，即刻計到要幾多里。

⛽ 燃油附加費更新：國泰由 2026年8月1日起調高，費用按每航段計算；最終稅費以出票頁為準。

唔明？撳一下睇攻略

出發

到達

停留

距離

📏 飛行區域對照表（區 1–13）

區	距離（哩）	經濟	商務	頭等
1	≤1,000	30,000	60,000	75,000
2	1,001–1,500	35,000	65,000	85,000
3	1,501–2,000	40,000	70,000	95,000
4	2,001–4,000	45,000	80,000	110,000
5	4,001–7,500	63,000	100,000	150,000
6	7,501–9,000	68,000	120,000	165,000
7	9,001–10,000	77,000	135,000	175,000
8	10,001–14,000	95,000	170,000	250,000
9	14,001–18,000	105,000	210,000	310,000
10	18,001–20,000	115,000	230,000	330,000
11	20,001–25,000	126,000	250,000	350,000
12	25,001–35,000	140,000	265,000	365,000
13	35,001–50,000	160,000	280,000	380,000

總距離落邊個範圍＝邊個區；差幾哩就跳區。

📞 點樣出票（打電話 checklist）

寰宇一家環球票多數要打電話出：Asia Miles 熱線 +852-2747-3333——揀英文線通常快好多。
出票前一定要自己 check 每段有冇獎勵位——上國泰官網兌換頁睇：國泰官方兌換機票頁 ↗。呢個 planner 只幫你計里數同驗規則，唔會知邊日邊班真係有位——實際放位一定以官網／熱線為準。
快手查位：裝第三方瀏覽器 plugin「Cathay Unelevated Award Search」（userscripts.jayliu.net/cx.html，要先裝 Tampermonkey；iOS 用 Stay）——一次過查 20 日、四個艙等、篩直航。獨立開發者嘅工具，喺你自己瀏覽器行。
⚠ 唔同航空公司嘅位，唔一定喺同一個網站見到。國泰系統／上面個 plugin 主要 show 國泰 pull 到嘅盤；日本航空（JAL）等夥伴嘅位國泰未必見齊，好多人會再上英國航空 ba.com或澳洲航空 qantas.com查一次；美國航空、Alaska就用各自官網。（呢啲係玩家經驗，各航司系統時有變動，實際以該航空公司官方為準。）
打之前準備好每段嘅日期、航班號、艙等——用上面嗰啲網站逐段查定先。
2022 年系統整合後，如果行程唔涉美國航空、城市少過 6 個，有機會直接喺國泰網上換到（未必次次得）。
職員未必熟呢張表——唔啱聽收線再打，搵個熟嘅。
里數只係免機票價：燃油附加費（YQ）＋稅費要另外畀現金，英航／卡塔爾段 YQ 特別重，芬蘭／日航相對輕。

ℹ️ 數據來源同規則細節

里數表：13 區 × 3 艙共 39 格已逐格對過官方換算表原文（2026-07-11 截圖），全部一致 ✅。

規則六條已對官方 T&C 原文（會員條款「Flight Awards – oneworld Multi-carrier Awards」）；24 小時停留／轉機界線＝客服熱線確認；「返到出發國家」＝cxplanner／論壇轉述（官方六條冇明文）。

距離係大圓計法（官方標準獎勵條款第 3 條明文採用）——貼近區界嘅行程，出票前打熱線問準。

攻略

由賺到用逐步教

我的收藏

關於 AcreMiles

AcreMiles（畝・里）係乜？

你人生大事有一筆大額消費（結婚、裝修、大旅行），AcreMiles 幫你計清楚：申請邊幾張卡、每張簽幾多、幾時簽——一次過將 Asia Miles / Avios 儲到盡。

計法假設

假設大部分為本地／網上簽賬，每張卡用佢最抵嗰個賺里率計基本里。
填咗年薪，就會自動隔走你申請唔到嘅卡（年薪門檻以官網為準）。
迎新只會加上可以確定嘅基本賺里；如果官方迎新總數已經包埋基本簽賬里數，會自動扣走重複部分，唔會計兩次。
「呢筆錢會點洗？」分兩件事：洗錢期——一炮過（買錶／買車／一次過畀清）＝一日簽晒，抵率有上限嘅卡淨計一個月／一季上限，超出即刻跌基本率；分幾個月（訂金／裝修分期）＝攤開貼住上限計。籌備期——就算一炮過洗，你都可以提早幾個月開卡（例：7月開始申請、12月先買錶），所以啲卡唔會因為「一日洗晒」就趕唔切，全部照用。呢兩樣係獨立嘅。
部分卡嘅高賺里率有上限——有啲按月（例：DBS 海外優惠）、有啲按季（例：AE Explorer 本地 $3/里每季首 $15,000）、有啲成個期間一個數（例：AE 白金 Turbo 每年首 $16 萬）。超過上限嘅簽賬會跌落基本率計，唔會假設成張卡無限量都係嗰個靚 rate。大額簽賬去到上限，會自動溢去下一張最抵嘅卡，唔會死頂一張。
資格安全閘：預設按各卡現行官方迎新條款估算；想更準可以逐張確認資格，確認後只計已確認嘅卡。同銀行已有卡時，只會用官方明文記錄嘅現有客優惠，否則迎新當零計並會講明——唔會猜冷河或者第二張卡折扣。
新卡最多 6 張係你自己揀嘅總量規劃上限。自己查環聯（TransUnion／TU）同銀行審批申請係兩回事；系統唔會把「每月兩張」冒充銀行規則，實際申請節奏要按個人信貸情況同銀行要求決定。
有年費嘅卡，時間表會提你到期前 cancel 或打電話 waive，唔好白畀年費。
迎新數字常變（今個月同下個月可以差好遠），只作參考，一定要撳去官網／里先生睇今期。
大額付款如果商戶唔收卡，可能要用 PayAll 一類代付工具，會有手續費——本版未計入。

免責聲明

AcreMiles 係教育及規劃工具，唔係財務、信貸、法律、稅務或旅遊預訂建議；計算同推薦只係估算，唔保證最抵、最完整、獲批或換到。
卡資料、迎新同渠道優惠可能改動、過時或有錯；申請或簽賬前要開銀行最新產品頁、KFS 同條款確認。
申請信用卡會影響信貸紀錄；請量力而為，切勿為儲里數過度消費。
環球票路線係教學示例；票規通過唔等於指定日期有班次、獎勵位或一定出到票，最終以航空公司正式確認同出票結果為準。
利益披露：目前冇任何 referral 或聯盟收益。卡庫收錄標準係「香港市面主流」，同有冇 referral 完全脫鈎；日後如有 referral link，會喺該張卡清楚標明「呢個係推薦連結」。

資料

計算器輸入、儲低嘅計劃同外觀設定會先存喺你部機（localStorage）；你可選擇 Google 備份指定資料。未登入唔會傳去雲端；你主動訂閱先會將 email 交畀 MailerLite，匿名統計／錯誤診斷亦只會喺你同意後載入。

每張卡都有獨立頁面，方便直接 share 畀朋友。

發現問題？撳右下角 🤖 畝里嘅「電郵我哋」，或者直接電郵 support@acremiles.app，講低喺邊一頁、見到乜情況就得。

AcreMiles · 卡數據截至

使用條款

服務性質
AcreMiles 係教育及規劃工具，唔係銀行、航空公司、信貸資料機構或信用中介，亦唔代表你申請信用卡或預訂機票。本服務唔構成財務、信貸、法律、稅務、投資或旅遊預訂建議。

計算及推薦限制
結果按你輸入嘅資料、已列明假設同保守計法作估算，未必涵蓋所有產品、費用、排除交易或個人情況。AcreMiles 唔保證結果係最抵、最完整、一定獲批、一定賺到所示里數，亦唔保證慳到所示金額。

信用卡資料
迎新、賺里率、年費、申請資格、名額、推廣期同條款可以隨時更改。AcreMiles 會標示資料日期同來源，但仍可能有延誤、遺漏或錯誤；申請、登記或簽賬前，必須自行開發卡銀行最新產品頁、KFS／收費概要及完整條款核對。

負責任借貸
申請信用卡可能產生硬查詢並影響信貸紀錄、批核或日後借貸；逾期或未全數還款可產生利息、費用同失去優惠。唔好為賺里數而製造本來唔會有嘅消費，只應申請你理解而且負擔得到嘅產品。借定唔借？還得到先好借！

環球票及行程示例
示範路線只用嚟解釋票規上可以點砌，唔係可直接照抄嘅預訂建議或出票保證。自費開口、同城轉機場、季節航線或班次變動可以係教學設計一部分；票規通過亦唔代表指定日期有航班、接駁可行、獎勵位、指定艙等，或里數、稅項及附加費不變。預訂前要逐段查官方時刻、獎勵位同條款，並以航空公司正式確認及最終出票結果為準；客服口徑如有不同，要再次核對。

第三方及品牌
銀行、航空公司、比較平台連結及商標只用作識別資料來源或相關產品，唔代表對方認可、贊助 AcreMiles 或同 AcreMiles 有合作。外部網站由第三方負責，使用時受對方條款及私隱政策約束。

利益披露
截至最後更新日，本 app 冇任何 referral／聯盟／廣告收益，卡庫收錄同排序唔取決於佣金。日後如有廣告、合作或推薦連結，會喺私隱政策更新，並喺每篇相關內容當眼位置清楚標明；資料標準保持一致——有冇佣金都唔會影響邊張卡入選或者排幾前。

責任範圍
喺法律容許範圍內，AcreMiles 唔會為因依賴估算、第三方資料、服務中斷或未有先核對官方條款而造成嘅間接或可避免損失負責。呢段條款唔會排除欺詐、因疏忽引致死亡或人身傷害，亦唔會削減法律上不可排除嘅消費者權利。

問題及更正
如發現錯誤，請連同頁面、資料日期及截圖電郵 support@acremiles.app。重大錯誤會更正並保留必要修正紀錄。

最後更新：2026-08-01

優惠受條款及細則約束，資料只供參考。
借定唔借？還得到先好借！

私隱政策

本機儲存（提供功能所需）
你嘅金額、年薪、計劃、行程、收藏同設定會先存喺你自己部機嘅 localStorage；唔登入都可以完整使用。你可獨立清除本機資料。

Google 備份與同步（你主動連接先有）
連接 Google 後，只會備份你儲存嘅點賺計劃、點用計劃、收藏同少量外觀設定。計劃可能包含你輸入嘅消費額、收入／家庭收入及計算選項；每項按最後修改時間合併，已刪除項目唔會由舊資料復活。登入 Google 只係為咗備份，唔代表同意接收優惠電郵——電郵訂閱要另外剔選。唔會備份匿名統計選擇、暫存表格、電子錢包、卡號、保安碼或銀行登入資料。登出只係登出；你可以獨立刪除雲端備份。

匿名改善（你同意先載入）
開啟後，Google Analytics 會收集基本使用統計，Sentry 會收集程式錯誤、裝置／瀏覽器環境同已移除 query 嘅頁面路徑，目的係搵壞掣同改善穩定性。系統會過濾表單內容、email、完整 URL query、headers、cookies 同 user 欄位。唔同意，兩項服務都唔載入，核心功能照用；可隨時喺「⋯ 更多」關閉。

Cookie 同類似技術
AcreMiles 預設唔會放任何統計或廣告 cookie。你未開「匿名改善」之前，網站淨係用你部機嘅 localStorage 記住你自己嘅計劃同設定——嗰啲唔會傳去任何伺服器，亦唔會用嚟追蹤你。開咗「匿名改善」之後，Google Analytics 會放佢自己嘅統計 cookie（_ga 系列）去分辨重複訪客；Sentry 唔用 cookie，只用本機儲存記錄診斷狀態。關返「匿名改善」就唔會再送新資料，你亦可以喺瀏覽器設定度自行清除已存在嘅 cookie。我哋唔會放廣告 cookie，亦唔會將你嘅資料賣畀第三方。留意：撳外部連結去到銀行或比較平台之後，對方會放自己嘅 cookie（例如追蹤你由邊個平台過去），嗰啲唔喺 AcreMiles 控制範圍。

Email 訂閱（你主動提交先有）
你剔選同意並撳「訂閱」後，email 會傳送畀 MailerLite，用嚟寄 AcreMiles 優惠消息及處理退訂／確認信；唔會用於推薦計算。每封電郵都可以退訂。

外部連結同聯盟披露
撳銀行、航空公司或比較平台連結後，會離開 AcreMiles，對方按自己嘅私隱政策處理資料。截至最後更新日，AcreMiles 冇任何 referral／聯盟／廣告關係：現時所有外部連結都係公開連結，唔會為我哋帶嚟任何收益，卡庫收錄同排序亦唔取決於佣金。日後如果有聯盟關係，我哋會（一）喺呢度更新，（二）喺每篇含聯盟連結嘅內容當眼位置標明，（三）維持同一套資料標準——收唔收得到佣金都唔會影響邊張卡入選或者排幾前。

邊個負責處理你嘅資料
AcreMiles 由 Mrs HAU YING OU-YANG 以個人／sole trader 身份喺英國營運，佢係本服務嘅資料控制者。ICO 登記編號：ZC174150。私隱查詢請電郵 support@acremiles.app，或按以下用途寄送：

郵件／通訊（信件及可投入信箱嘅小型郵件）HAU YING OU-YANG
Unit 170198, PO Box 7169
Poole, BH15 9EL
UK

包裹／快遞專用（parcel and courier delivery only）HAU YING OU-YANG
Unit 170198, Courier Point
13 Freeland Park, Wareham Road
Poole, Dorset, BH16 6FH
UK

處理資料嘅原因
本機資料用嚟提供你主動要求嘅計算、收藏同行程功能；Google 備份只會喺你主動連接後提供跨裝置還原；Google Analytics 同 Sentry 只會喺你明確同意後，用嚟了解整體使用情況同修正程式錯誤；優惠電郵只會喺你主動剔選同意後寄出。

保存時間
本機資料保存到你清除為止；雲端最新狀態保存到你用「刪除雲端資料」移除為止。截至 2026-07-20，AcreMiles 嘅 Google Analytics 設定顯示：事件資料 2 個月、使用者資料 14 個月；Sentry Developer 計劃嘅錯誤事件可查閱期係 30 日。MailerLite 會喺訂閱有效期間保存 email；退訂會停止宣傳電郵，但可能保留最少封鎖紀錄。

你嘅選擇及權利
你可以登出 Google、獨立刪除雲端資料、獨立清除本機資料、關閉匿名改善或退訂電郵，亦可要求查閱、更正、刪除、限制或索取由 AcreMiles 持有嘅個人資料。我哋會盡快處理有效要求，最遲喺收到要求後一個曆月內回覆。如你對處理方式不滿，可向英國 Information Commissioner’s Office（ICO）投訴。

最後更新：2026-07-26

asia miles 新手攻略：點賺？點換？幾時過期？

新手必讀 · 第一課

你張卡，一路嘥緊一張機票

由零開始：點賺、點換、要俾幾多、幾時過期。

碌啱信用卡、食埋迎新，一張台北來回機票（14,000 里）近過你想像。呢篇五分鐘，由零講起。

迎新可低至$0.25／里

日常簽賬$2–8／里

台北來回14,000 里

里數係咩

亞洲萬里通（Asia Miles）係積分：儲夠就換機票，唔使畀票價，淨係畀稅同附加費。儲得越多，飛得越遠、坐得越前。

三條路賺

① 日常簽賬——每張卡有個率：本地 $8 一里、指定類別 $2 一里、海外 $3–4 一里。日日碌，一路儲。

② 迎新（最大條水喉）——新客簽夠門檻一舊過送，成本可以平到 $0.25 一里，同日常差幾十倍。一個迎新隨時夠一張短途機票。

③ 搭 oneworld 航班——國泰、日航、英航呢啲，飛完賺返里。唔係主力，順手儲。

換到啲乜

由台北（單程 7,000 里）、日本（13,000）一路去到倫敦、紐約；玩到盡仲有環球票——一個價飛勻幾大洲。

💡 里數唔等於免費。里數只免「票價」——燃油附加費（YQ）＋稅要現金；金額按航段、行程起點及地區計算，國泰每兩星期檢視及修訂，最終以出票頁為準。

仲有：里數一般設有效期，可透過賺取或使用活動延續——戶口長期唔郁，啲里會過。偶爾登入睇睇。（規則以官網最新為準。）

常見問題

里數會唔會過期？

一般設有效期，可以透過賺取或使用活動延續——戶口長期唔郁啲里會過，偶爾登入睇睇。

迎新同日常簽賬爭幾遠？

迎新可以平到 $0.25/里，日常簽賬 $2–8/里——差幾十倍，所以迎新先係最大條水喉。

「免費機票」真係免費？

唔係。里數只免票價，YQ 燃油費＋稅照要現金；燃油附加費按航段、行程起點及地區計算，最終以出票頁為準。

延伸閱讀

所有迎新、賺率、里數同細節，受各發卡機構及亞洲萬里通條款及細則約束，以官網公佈為準。借定唔借？還得到先好借！

信用卡點砌組合：分幾張卡賺盡迎新，買嘢換到機票

新手必讀

買部 iPhone，換張台北來回

重點唔係揀最好嘅卡，係砌最啱嘅組合。

部 iPhone 約 $8,000——已經夠簽起一張迎新。呢一季 Citi PremierMiles 首兩個月簽 $5,000 攞 20,000 里，一張台北來回（14,000 里）仲有剩。你本來就要買，冇為張飛多俾一蚊。

EveryMile 指定商戶$2／里

Citi PM 海外$3–4／里

迎新$0.25／里

根本冇「最好」嘅卡

賺率唔係一個數，係睇你喺邊度簽：

EveryMile 指定商戶$2/里

EveryMile 其他簽賬$5/里

Citi PM 海外網上$3–4/里

Citi PM 本地$8/里

強嗰忽賺到盡、弱嗰忽賺得慢——冇一張全能。

真正玩法：分工碌

買咖啡入超市 → EveryMile；出國網上外幣 → PremierMiles；雜項 → 邊張底率高碌邊張。兩三張卡分工，一年落嚟同求其一張碌，里數爭一大截。

💡 迎新四條規矩：一次性（攞完就冇）；要真消費（交稅、PayAll、繳費多數唔計）；有限期（每季變，簽前對官網當期 T&C）；早 cut 會扣返（多數 12 個月內取消就收返啲里）。

年費同上限，睇清先係真賺

呢類卡年費動輒一兩千：EveryMile 首年免、之後 $2,000，年簽 $80,000 豁免。仲有名單限制——個 $2 淨係限指定商戶（Starbucks 得、酒樓唔得），名單銀行話改就改。唔好當「所有嘢 $2」。

人手計好煩——去底部「計算」入你嘅洗費，邊種洗費碌邊張、迎新年費全部預埋，一眼睇晒。

常見問題

一張卡搞掂得唔得？

得，但賺得慢——冇一張卡全能。兩三張分工碌，一年落嚟里數爭一大截。

迎新可唔可以重複食？

唔可以，一次性——而且多數卡 12 個月內 cut 會扣返啲里。

咁邊張卡「最好」？

冇呢樣嘢。睇你喺邊度簽：咖啡超市 EveryMile、海外網上 PremierMiles——強嗰忽先賺到盡。

延伸閱讀

所有迎新、賺率、里數同細節，受各發卡機構及亞洲萬里通條款及細則約束，以官網公佈為準。借定唔借？還得到先好借！

寰宇一家環球票

進階玩法 · 王牌

一張飛，玩勻幾大洲

現金逐程買實測 HK$21 萬。識玩：265,000 里＋稅搞掂。

香港出發，停東京、三藩市、紐約、倫敦再返嚟——五個城市、橫跨幾大洲，一張機票一筆里數。呢個叫寰宇一家環球票（oneworld Multi-carrier Award），亞洲萬里通最抵、亦最少人識用嘅一張飛。

市價逐程買≈ HK$21 萬

用 Asia Miles265,000 里

另加燃油稅約 HK$1 萬

點解咁抵：買嘅係「總距離」

成條行程所有實飛航段距離加埋，總數落邊個「區」就畀嗰個價——停幾多度、飛幾多程都唔影響。識砌嘅人，同一個價塞盡幾多城市。

寰宇一家里數分區表距離範圍 × 三艙（Asia Miles）

區	距離（哩）	經濟	商務	頭等
1	≤1,000	30,000	60,000	75,000
2	1,001–1,500	35,000	65,000	85,000
3	1,501–2,000	40,000	70,000	95,000
4	2,001–4,000	45,000	80,000	110,000
5	4,001–7,500	63,000	100,000	150,000
6	7,501–9,000	68,000	120,000	165,000
7	9,001–10,000	77,000	135,000	175,000
8	10,001–14,000	95,000	170,000	250,000
9	14,001–18,000	105,000	210,000	310,000
10	18,001–20,000	115,000	230,000	330,000
11	20,001–25,000	126,000	250,000	350,000
12	25,001–35,000	140,000	265,000	365,000
13	35,001–50,000	160,000	280,000	380,000

距離＝全程實飛總和；差幾哩就跳區，規劃器即時提你。表以官網為準。

玩之前要知嘅規矩

5
停留
落地過夜玩
2
轉機
<24 鐘接機
2
開口
中間自己搞掂
16
航段上限
總飛行段數
50k
總哩上限
全程距離
0
特選經濟
冇呢個艙

仲有兩條：成張票跟最貴嗰程個艙計；航空公司組合——冇揀國泰＝啱啱 2 間 oneworld，有國泰＝3 間或以上，全程只准 oneworld。

💡 塞盡個區，唔好跳出去。每區上限就係懸崖：34,998 哩＝Zone 12（14 萬）；貪心繞到 35,001 哩跌落 Zone 13（16 萬）——多個城市實收你兩萬里。

點出票

呢類票要打會員熱線：+852 2747 3333（英文線快啲）。規劃器計到價錢同 route；「嗰日有冇位」係另一件事——用第三方查位工具睇實有位先打熱線。

睇真實例子：兩條現成線

常見問題

環球票點計價？

買嘅係「總距離」——成條行程所有航段距離加埋，落邊個區就畀嗰個價，停幾多度都唔影響。

抵幾多？

示範線市價逐程買約 HK$21 萬；用 265,000 里＋約 $1 萬燃油稅搞掂。

額度有幾多？

最多 5 個停留＋2 個開口＋2 個轉機——用盡可以去到 11 個目的地。

延伸閱讀

規則以國泰航空官方最新公佈為準；本文只係幫你入門，唔構成任何保證。借定唔借？還得到先好借！

265,000 里寰宇一家：五大洲十個城市

路線實例 · 五大洲

265,000 里，飛勻五大洲

東京・紐約・多倫多・邁阿密・聖保羅・里約・倫敦・開普敦・多哈・曼谷——一張飛。

呢條線用現金逐程買商務，實測埋單約 HK$21 萬。用 Asia Miles？265,000 里；燃油附加費同稅按實際航段於出票頁確認。以下係張「飛」出咗嚟嘅樣——

示範行程 · 規劃器引擎驗證

265,000 里 · 商務

Zone 12｜總飛行 34,618 哩｜距區頂僅 382 哩｜燃油附加費於出票頁確認

HKG香港出發

HND東京（羽田）停留

JFK紐約停留

⤳ 開口：紐約 → 多倫多（呢段唔喺張飛入面，自己搭車／買平機駁過去）

YYZ多倫多出發

MIA邁阿密停留

GRU聖保羅停留

⤳ 開口：聖保羅 → 里約（呢段唔喺張飛入面，自己搭車／買平機駁過去）

GIG里約熱內盧出發

LHR倫敦停留

CPT開普敦停留

DOH多哈轉機 <24h

BKK曼谷停留

HKG香港返到屋企

逐程現金買≈ HK$21 萬

Asia Miles265,000 里

每 1 里等於慳HK$0.75+

逐站拆：去邊、玩乜

🇯🇵 東京（停留）——港護照日本免簽。開波第一站，羽田入市區半個鐘：食碗拉麵、行下淺草、掃埋藥妝先起飛過太平洋。

🇺🇸 紐約（停留・開口位）——中央公園、百老匯、自由神像。⚠️ 港人去美國要預先申請簽證（面簽），出發前最少兩三個月搞。玩完呢度係開口：自駕上多倫多睇千島湖（約 8 個鐘）或者內陸機個半鐘。⚠️ 入加拿大要另外申請 eTA。

🇺🇸 邁阿密（停留）——South Beach、Art Deco 老區、小哈瓦那食古巴三文治。呢度亦係美國航空飛南美嘅大本營，落一程就直插巴西。

🇧🇷 聖保羅（停留・開口位）——南半球！巴西燒烤食到飽、Ibirapuera 公園、街頭藝術。港人免簽，最遠嗰程反而最易入境。之後第二個開口：飛去里約睇基督像同 Copacabana（廉航約 HK$240–570，飛一個鐘；巴士 6 個鐘 HK$150）。

🇬🇧 倫敦（停留）——大英博物館、West End、Borough Market。港人免簽 6 個月，係成條線最放鬆嗰站。

🇿🇦 開普敦（停留）——非洲大陸！桌山纜車、好望角、Stellenbosch 酒莊，仲有企鵝灘。港人免簽 30 日。

🇶🇦 多哈（轉機）——卡塔爾航空官方有 Discover Qatar 轉機導賞團：轉機 6 個鐘以上，跟官方團出去睇瓦其夫市集、濱海大道、伊斯蘭藝術博物館，玩完準時返機場。

🇹🇭 曼谷（停留）——亞洲收尾：街頭小食、水上市場、天台 bar，鬆晒先返香港，五大洲圓滿。

✈️ 快閃前睇簽證（香港特區護照）日本免簽美國要預先簽證加拿大網上 eTA巴西免簽南非免簽卡塔爾免簽泰國免簽英國免簽 6 個月以各領事館最新公佈為準；BNO 待遇唔同，自己揸嘅護照自己查。

💡 呢條線嘅精髓：34,618 哩塞喺 Zone 12 上限（35,000）之下，只差 382 哩到頂——五個停留＋一個轉機快閃＋兩個開口（每個開口都係「買一送一」城市），一個價玩盡五大洲。差半步就跳去 280,000 里，砌得啱啱好先係功夫。

常見問題

多哈轉機團係乜？

卡塔爾航空官方 Discover Qatar 導賞團——轉機 6 個鐘以上，跟官方團出去睇瓦其夫市集，玩完送返上機。

開口點解係「買一送一」？

張飛飛你入 A 城，你自己平價駁去 B 城再上機——一個開口額，玩咗兩個城市。

入境要注意乜？

美國要預先簽證、加拿大要網上 eTA——開口過境前自己查清楚。

延伸閱讀

行程為示範參考；獎勵位、簽證、轉機計劃以各官方最新公佈為準。市價為實測參考，隨季節波動。

250,000 里寰宇一家：倫敦巴黎紐約多倫多

路線實例 · 亞歐美三洲

250,000 里，完成人生 bucket list

倫敦・巴黎・紐約・多倫多・芝加哥・洛杉磯・新加坡・吉隆坡・台北。

少 15,000 里，一樣狠：五個停留＋兩個開口，經典環球路——去程中東入歐洲，橫過大西洋掃北美，太平洋收尾。

示範行程 · 規劃器引擎驗證

250,000 里 · 商務

Zone 11｜總飛行 24,470 哩｜距區頂 530 哩｜燃油附加費於出票頁確認

HKG香港出發

DOH多哈轉機 <24h

LHR倫敦停留

CDG巴黎停留

JFK紐約停留

⤳ 開口：紐約 → 多倫多（呢段唔喺張飛入面，自己搭車／買平機駁過去）

YYZ多倫多出發

ORD芝加哥停留

LAX洛杉磯停留

NRT東京轉機 <24h

SIN新加坡停留

⤳ 開口：新加坡 → 吉隆坡（呢段唔喺張飛入面，自己搭車／買平機駁過去）

KUL吉隆坡出發

TPE台北停留

HKG香港返到屋企

逐站拆

🇶🇦 多哈（轉機）——落地就玩官方轉機團快閃（詳見）。

🇬🇧 倫敦（停留）——大英博物館、West End 音樂劇、Borough Market。港人免簽 6 個月。

🇫🇷 巴黎（停留）——鐵塔、羅浮宮、瑪黑區 croissant。倫敦飛巴黎呢程喺張飛入面，唔使自己買歐洲之星。

🇺🇸 紐約（停留・開口位）——曼哈頓玩完，開口自駕或內陸機去多倫多（CN Tower、尼亞加拉日歸），YYZ 上返條線。⚠️ 美國要預先簽證、加拿大要 eTA。

🇺🇸 芝加哥（停留）→ 洛杉磯（停留）——雲門、深盤 pizza，然後 LA 曬太陽——一張美國簽證行晒三個站。

🇯🇵 東京（轉機快閃）→ 🇸🇬 新加坡（停留）→ 開口去 🇲🇾 吉隆坡 → 🇹🇼 台北（停留）——亞洲收尾四重奏，玩法。

✈️ 快閃前睇簽證（香港特區護照）英國免簽法國免簽美國要預先簽證加拿大網上 eTA日本／馬來西亞／新加坡免簽台灣網上入台證以各領事館最新公佈為準。

💡 呢條線嘅精髓：24,470 哩塞喺 Zone 11 上限（25,000）之下——差 530 哩就跳區，砌得啱啱好先係功夫。想改站？開規劃器自己試，睇實總距離。

常見問題

同實例①爭啲乜？

少 15,000 里（250,000），行經典環球路：中東入歐洲、橫大西洋掃北美、太平洋收尾。

開口段點駁？

紐約→多倫多、新加坡→吉隆坡兩段唔喺張飛入面——自己搭車或者買平機駁過去。

倫敦飛巴黎使唔使自己買？

唔使——嗰程喺張飛入面，慳返張歐洲之星飛。

延伸閱讀

行程為示範參考；獎勵位、簽證、轉機計劃以各官方最新公佈為準。

寰宇一家環球票：五條線，由 12 萬里起

五條線＝五個預算級別，由 12 萬里玩日韓泰，去到 28 萬里踩勻六大洲。每條都用盡規則（停留／開口／轉機），每站都係真旅遊熱點——揀啱你嗰級，撳入去睇逐站點玩。

🗾 日韓泰（區6・商務 120,000 里）——札幌滑雪→沖繩→東京→首爾→曼谷→吉隆坡。6 城市，差 70 哩就到區頂。

🏔️ 日澳泰（區8・商務 170,000 里）——札幌→福岡→東京→悉尼→墨爾本→星馬→曼谷。8 城市，差 138 哩就到區頂。

🌍 歐美城市線（區10・商務 230,000 里）——馬德里、巴黎／倫敦、紐約、波士頓，再經西雅圖／溫哥華去東京、台北。19,960 哩，5 停 2 轉 2 開口，距區頂只差 40 哩。

🏜️ 蜜月環球之旅（區11・商務 250,000 里）——馬爾代夫→多哈→開羅→紐約→洛杉磯，全部係平機唔會去嘅地方。

🌏 終極版環遊世界（區13・商務 280,000 里）——11 個目的地、六大洲、兩個開口，赫爾辛基睇北極光。

💡 規劃器主畫面有區8＋區11快速示範；五條線嘅全文都有「DIY」掣，包括新區10，鍾意邊條就一撳載入再自己改。

常見問題

點揀路線？

五條都係有效候選設計：由 12 萬里日韓泰，一路去到 28 萬里六大洲。先按里數預算揀級別，再按自己日期逐段查班次同獎勵位。

可唔可以照抄？

唔可以直接照抄。規劃器會分開顯示票規同逐段直航核實狀態；指定日期班次、獎勵位同最終出票仍要逐段查。

市價估算準唔準？

粗略估算，出票前自行格價；獎勵位有冇要逐段查並由熱線確認。

延伸閱讀

里數、規則以官方公佈為準；市價為粗略估算，出票前請自行格價；獎位有冇要打熱線先知。

120,000 里寰宇一家：北海道玩到東京再去埋韓國泰國

最入門嘅環球票：一張飛滑雪、海灘、掃街、按摩四樣齊——8,930 哩・區 6・商務 120,000 里・4 停 1 轉 1 開口，距區頂只差 70 哩。

HKG香港出發

CTS札幌停留

OKA沖繩停留

⤳ 開口：沖繩 → 東京羽田（呢段唔喺張飛入面，自己搭車／買平機駁過去）

HND東京（羽田）出發

GMP首爾（金浦）停留

⇄ 同城轉機場：金浦 GMP 落機・仁川 ICN 起飛（市內自行過去）

HKG香港轉機 <24h

BKK曼谷停留

KUL吉隆坡停留

HKG香港返到屋企

ℹ 核實時發現日航現行係羽田 HND → 金浦 GMP，唔係原先寫嘅成田 NRT → 仁川 ICN；國泰返香港就由仁川 ICN 開出，所以首爾要自行轉機場，出票時必須問清楚點計。首爾去曼谷要經香港，會用全程一個轉機額；香港只做接駁，唔當停留。沖繩→東京就係自費開口段。

15 萬大額消費用啱卡即賺一程六站之旅：北海道滑雪、沖繩、東京澀谷、首爾明洞、曼谷、吉隆坡

逐站點玩

札幌 — 落地即滑雪（二世古／留壽都），湯咖喱、成吉思汗烤肉暖返。

沖繩（開口位） — 滑完雪直插海灘，美國村、水族館，溫差玩盡。玩完自己飛去東京（廉航 HK$400–800）。

東京 — 血拼主場：新宿、澀谷、銀座。

首爾 — 明洞掃美妝、弘大食烤肉。

曼谷 — 按摩、夜市、天台 bar。

吉隆坡 — 雙子塔、茨廠街、肉骨茶，鬆晒先返香港。

點解咁排

香港人玩法：急住滑雪放最頭（雪季唔等人），血拼站東京＋首爾夾中段，曼谷放鬆收尾——係情緒節奏，唔係地圖順路。

一次大額簽賬，就儲夠成條線

唔使儲幾年。結婚、裝修、大旅行——一次過簽 HK$135,000，用啱卡組合食迎新，計算機出到：

一個人簽約 115,000 里

二人家庭一齊簽約 190,000 里

對返區 6 個價——經濟 68,000 里・商務 120,000 里：

一個人經濟換完仲有找

二人家庭商務都夠，仲剩 7 萬里

北海道滑雪、東京首爾血拼、尾站曼谷揼骨，五個站，一張飛。
去「計算」入你自己嘅金額，睇下你嗰個組合食到幾多。

⚠️ 講清楚：以上係計算機根據當時嘅迎新同賺里率估算（單人估算範圍約 100,000–125,000 里、二人家庭約 170,000–210,000 里），實際要睇你申請到邊幾張卡、批唔批到、迎新有冇改。二人家庭＝兩位都申請，同一張卡嘅迎新各食一份。里數同區價以官方公佈為準。

商務逐程買（估）≈ HK$6–9 萬

用 Asia Miles120,000 里

燃油附加費＋稅出票頁確認

常見問題

120,000 里大約簽幾多先儲到？

用 app 實測：HK$135,000 大額消費，單人約 115,000 里、二人家庭約 190,000 里——迎新食得好就大致夠。

五個站可唔可以改？

可以——撳 DIY 載入規劃器自己改站，總距離唔好爆區 6 就得。

行程次序點解咁排？

由北向南追住玩：札幌滑雪 → 沖繩海灘 → 東京首爾血拼 → 曼谷按摩收尾，一程食盡幾種玩法。

延伸閱讀

里數、規則以官方公佈為準；市價為粗略估算，出票前請自行格價；獎位有冇要打熱線先知。

170,000 里寰宇一家：日本澳洲星馬泰

八個城市、兩個開口，貼到區頂淨返 138 哩——13,862 哩・區 8・商務 170,000 里・4 停 2 開口。規劃器嘅示範掣之一就係佢。

HKG香港出發

CTS札幌停留

FUK福岡停留

⤳ 開口：福岡 → 東京羽田（呢段唔喺張飛入面，自己搭車／買平機駁過去）

HND東京（羽田）出發

SYD悉尼停留

MEL墨爾本停留

SIN新加坡停留

⤳ 開口：新加坡 → 吉隆坡（呢段唔喺張飛入面，自己搭車／買平機駁過去）

KUL吉隆坡出發

BKK曼谷停留

HKG香港返到屋企

ℹ 核實時發現日航現行直航係羽田 HND → 悉尼 SYD，唔係原先寫嘅成田 NRT。兩段開口係福岡→東京同新加坡→吉隆坡；悉尼→墨爾本就用里數飛。

南半球？北半球？Why not both！札幌滑雪、福岡太宰府櫻花、悉尼歌劇院、曼谷大皇宮

逐站點玩

札幌 — 滑雪開波。

福岡（開口位） — 屋台拉麵、太宰府，日本最好食嘅城市之一。之後坐新幹線上東京，五個鐘睇住風景過。

東京 — 開口位落腳，血拼主場：新宿、澀谷、銀座。

悉尼 — 歌劇院、邦迪海灘，一程飛咗成季（北半球冬→南半球夏）。

墨爾本 — 咖啡之都、塗鴉小巷、大洋路，同悉尼完全兩種性格。

新加坡 → 吉隆坡 — 濱海灣花園、hawker 掃街；跨境去吉隆坡食肉骨茶、上雙子塔。

曼谷 — 按摩、夜市、天台 bar 收尾。

數口

呢條線淨係「香港⇄悉尼」商務來回市價已經 HK$3–4 萬；加埋日本兩程、澳洲內陸同星馬泰三站，逐程買隨時 HK$9–13 萬（粗略估算）。170,000 里一次過搞掂，仲要係一路向季節追。

商務逐程買（估）≈ HK$9–13 萬

用 Asia Miles170,000 里

YQ＋稅＋開口機出票頁確認

常見問題

「差 138 哩到頂」係咩意思？

總飛行 13,862 哩，區 8 上限係 14,000——即係淨返 138 哩。貼盡個區先最抵，冇嘥額度。

呢條線抵幾多？

商務逐程買估 HK$9–13 萬；里數需要 170,000，燃油附加費按航段、行程起點及地區計算，最終以出票頁為準。

想自己改站點做？

撳「一撳載入規劃器」DIY——睇住總距離唔好爆區就得。

延伸閱讀

里數、規則以官方公佈為準；市價為粗略估算，出票前請自行格價；獎位有冇要打熱線先知。

230,000 里寰宇一家：馬德里巴黎紐約波士頓

今次正式用盡全套配額：19,960 哩・區 10・商務 230,000 里・5 停 2 轉 2 開口，距 20,000 哩上限只差 40 哩。10 段獎勵航班都已按精確 IATA 機場同航空公司核實現行直航。

HKG香港出發

MAD馬德里停留

CDG巴黎停留

⤳ 開口：巴黎 → 倫敦（呢段唔喺張飛入面，自己搭車／買平機駁過去）

LHR倫敦出發

JFK紐約停留

BOS波士頓停留

PIT匹茲堡轉機 <24h

ORD芝加哥轉機 <24h

SEA西雅圖停留

⤳ 開口：西雅圖 → 溫哥華（呢段唔喺張飛入面，自己搭車／買平機駁過去）

YVR溫哥華出發

NRT東京（成田）停留

TPE台北停留

HKG香港返到屋企

ℹ 兩段自費開口係巴黎 CDG⤳倫敦 LHR 同西雅圖 SEA⤳溫哥華 YVR，唔計入 19,960 哩。匹茲堡同芝加哥必須控制喺 24 小時內，只作轉機；實際界線同成張票組合要出票時再確認。

區10 歐美城市環球示例：馬德里、巴黎、倫敦、紐約、波士頓、西雅圖、溫哥華、東京及台北；19,960 哩，5 停 2 轉 2 開口

逐站點玩

馬德里（停留） — 由香港直飛，tapas、普拉多同西班牙陽光開波。

巴黎⤳倫敦（開口①） — 馬德里飛巴黎後自己安排歐洲之星或機票去倫敦，再由希斯路接上。

紐約＋波士頓（停留） — 先玩百老匯同博物館，再飛波士頓行 Freedom Trail。

匹茲堡＋芝加哥（轉機） — 兩站都控制喺 24 小時內，唔佔停留配額，再接去西雅圖。

西雅圖⤳溫哥華（開口②） — 可坐 Amtrak Cascades 或巴士北上；由溫哥華接日航去東京。

東京＋台北（停留） — 成田入、桃園出都係同一機場鏈，最後由國泰直飛返香港。

✅ 10 段直航已逐段核實：CX 香港→馬德里及台北→香港、IB 馬德里→巴黎、BA 倫敦→紐約、AA／American Eagle 美國四段、JL 溫哥華→成田及成田→桃園。oneworld 官方將 American Eagle 列作 American Airlines regional partners；指定班次係主線定 affiliate、獎勵位同成張票可否組合，仍要出票前確認。

五間航空公司合計 10 段獎勵航班。YQ、機場稅、巴黎→倫敦同西雅圖→溫哥華兩段自費交通要按實際日期先計；網站唔會用未核實現金數字扮準確。

常見問題

點解今次區10合格？

規劃器按同一套大圓距離算法逐段重算為 19,960 哩，正好係區10；同時用滿 5 停留、2 轉機、2 開口，10 段都對中精確 IATA 機場同指定航空公司。

兩個開口包唔包？

唔包。巴黎 CDG→倫敦 LHR 同西雅圖 SEA→溫哥華 YVR 要自費安排；環球票分別由倫敦同溫哥華重新接上。

係咪可以直接照抄出票？

唔可以。基本票規同現行直航已核實，但指定日期班次、American Eagle affiliate 資格、獎勵位、稅費及成張票可否組合，最後仍要由 Asia Miles 確認。

延伸閱讀

里數、規則以官方公佈為準；市價為粗略估算，出票前請自行格價；獎位有冇要打熱線先知。

250,000 里寰宇一家：蜜月環球之旅，馬爾代夫開羅

馬爾代夫水上屋、開羅金字塔、紐約夜景——蜜月想去嗰啲地方，偏偏平機都唔飛。呢個級數就唔應該再塞平機去到嘅地方，全部係要用里數先抵飛嘅遠洲：24,658 哩・區 11・商務 250,000 里・5 停 2 轉，差 342 哩到頂。規劃器示範掣之一。

HKG香港出發

DOH多哈轉機 <24h

MLE馬爾代夫停留

DOH多哈停留

CAI開羅停留

LHR倫敦轉機 <24h

JFK紐約停留

LAX洛杉磯停留

HKG香港返到屋企

250,000 里全商務豪華蜜月之旅：馬爾代夫水上屋、開羅金字塔、紐約自由神像、洛杉磯荷李活

逐站點玩

馬爾代夫 — 水上屋度假開波，商務飛入去本身已經係體驗。

多哈 — 返程正式落地：瓦其夫市集、伊斯蘭藝術博物館、珍珠島。實例①嗰個轉機快閃團，呢度變成停留玩足。

開羅 — 金字塔、尼羅河，古文明震撼。

紐約 — 由沙漠古城跳落現代之巔（經倫敦轉機過大西洋）。

洛杉磯 — 加州陽光收尾先返港。

五站四個世界：印度洋離島、波斯灣、北非古國、美東美西——單獨飛邊個都貴到肉赤，一張票 250,000 里全包。

商務逐程買（估）≈ HK$18–25 萬

用 Asia Miles250,000 里

另加 YQ＋稅出票頁確認

常見問題

點解冇日本東南亞？

呢個級數唔應該再塞平機都去到嘅地方——全部係要用里數先抵飛嘅遠洲：馬爾代夫、開羅、美東美西。

多哈點解停完一次又經多一次？

全程最多兩次轉機；「每城一次」限制主要針對停留／開口。呢條線多哈一停（正式玩）一轉（純接駁），引擎票規檢查通過，但出票時仍要由職員確認。

抵幾多？

商務逐程買估 HK$18–25 萬；里數需要 250,000，燃油附加費同稅費按實際行程於出票頁確認。

延伸閱讀

里數、規則以官方公佈為準；市價為粗略估算，出票前請自行格價；獎位有冇要打熱線先知。

280,000 里寰宇一家：11 個目的地行齊六大洲

最盡嗰條：11 個目的地、六大洲、48,883 哩・區 13・商務 280,000 里——距 50,000 哩天花板只差 1,117 哩，5 停留＋2 開口＋2 轉機全部用晒，11 個城市已經係規則上限。

HKG香港出發

SYD悉尼停留

SCL聖地牙哥停留

⤳ 開口：聖地牙哥 → 聖保羅（呢段唔喺張飛入面，自己搭車／買平機駁過去）

GRU聖保羅出發

LHR倫敦停留

CPT開普敦停留

⤳ 開口：開普敦 → 約翰內斯堡（呢段唔喺張飛入面，自己搭車／買平機駁過去）

JNB約翰內斯堡出發

DOH多哈轉機 <24h

JFK紐約停留

LAX洛杉磯停留

HEL赫爾辛基停留

NRT東京（成田）轉機 <24h

HKG香港返到屋企

ℹ 最大限制：洛杉磯→赫爾辛基 AY1／AY2 係季節線，唔係全年固定有；日期唔合就要重砌整條線。悉尼→聖地牙哥、南美→倫敦、倫敦→開普敦、卡塔爾經多哈同芬蘭航空兩段都已逐段找到官方航線依據，但指定日班次同獎勵位仍要再查。

終極版環遊世界：芬蘭北極光、悉尼歌劇院、聖地牙哥安第斯山、聖保羅大教堂、開普敦桌山、紐約自由神像、洛杉磯荷里活

開口點玩（一個額換兩個城市）

聖地牙哥 ⤳ 聖保羅——飛入智利首都（安第斯山腳、酒莊），玩完自己飛去巴西再上機。呢程 LATAM／JetSMART 單程約 HK$740–1,370，一日 11–14 班，飛 4 個鐘。一個開口跨兩個國家。

開普敦 ⤳ 約堡——飛入開普敦（桌山、好望角、酒莊），玩完自己飛去約翰內斯堡再上機。FlySafair 單程平到 HK$300–590，每星期 320 班以上，飛 2 個鐘——南非國內線係全球最平之一。

其餘各站

悉尼 — 歌劇院、邦迪海灘開波，跟住直插南美。

聖地牙哥 → 聖保羅（開口） — 安第斯山腳嘅智利首都，自己飛去巴西（LATAM 約 HK$740–1,370，飛 4 鐘）。

倫敦 — 大英博物館、West End，歐洲中途站。港人免簽 6 個月。

開普敦 → 約堡（開口） — 桌山、好望角、酒莊；自己飛去約堡（FlySafair 約 HK$300–590，飛 2 鐘）。

紐約・洛杉磯 — 美國東西岸壓軸。⚠️ 要預先辦美國簽證，出發前最少兩三個月搞。

赫爾辛基 — 壓軸北極光。由赫爾辛基入拉普蘭（羅瓦涅米）睇極光、住玻璃屋，芬蘭航空喺呢度嘅國內線好密。

多哈・東京（轉機） — 輕裝快閃：行李留轉機，人出去唞一唞。

⚠️ 老實講：①轉機時數以實際航班為準，delay 會壓縮，唔好期望必定夠鐘出去玩。②開口嗰兩程接駁機自己出錢買，上面價錢係 2026-07 格價網水平，出發前自行格返。

商務逐程買（估）≈ HK$25–35 萬

用 Asia Miles280,000 里

YQ＋稅＋開口機出票頁確認

常見問題

開口段機票要幾錢？

自己買：聖地牙哥→聖保羅約 HK$740–1,370（飛 4 鐘）；開普敦→約堡平到 HK$300–590（飛 2 鐘）。兩段加埋約 HK$1,040–1,960——對比張飛慳嘅錢，微不足道。

想睇極光點加？

赫爾辛基本身就係呢條線嘅正式停留，唔使另外加。由赫爾辛基入芬蘭拉普蘭（羅瓦涅米）睇極光、住玻璃屋，芬蘭航空國內線好密，一個幾鐘就到。

額度用盡有幾多個目的地？

5 停＋2 開口＋2 轉機全用，可以去到 11 個。

延伸閱讀

里數、規則以官方公佈為準；市價為粗略估算，出票前請自行格價；獎位有冇要打熱線先知。

國泰8月1日起調高燃油附加費

最新消息 · 2026-07-24 官方公佈

國泰8月1日起調高燃油附加費

用里數換機票要留意實付稅費——香港出發每航段加幅一覽。

國泰喺 2026-07-24 公佈調整燃油附加費，2026-08-01 起生效。里數免嘅只係票價，燃油附加費（YQ）同稅照要現金——長途每航段加成 HK$397，換票前計埋先知實付幾多。

香港出發・每航段收費對照（官方）

航線	至 7月31日	8月1日起
香港 → 中國內地	HK$165	HK$198
其他航線	HK$241	HK$339
香港 → 南亞次大陸	HK$448	HK$633
香港 → 西南太平洋、北美、歐洲、中東及非洲	HK$965	HK$1,362

以上為香港出發嘅官方收費；行程喺其他地方出發，收費按當地官方表另計。

五樣嘢要知

按每航段計——唔係每張票一個價。香港⇄倫敦來回＝兩段長途；中間有轉機，段數仲會更多。

睇行程喺邊度開始——適用金額按出發地計；上面個表係香港出發嘅收費。

轉機行程可能多過一段——例如經多哈去歐洲，YQ 按實際航段逐段計。

最終稅費以出票頁為準——呢度只係燃油附加費一項；機場稅、保安費等另計。

國泰每兩星期檢視及修訂燃油附加費——所以本文列明生效日期同最後核實日期，過咗一排記得再對官方。

💡 換票點打算？行程同獎勵位已確認嘅話，7 月 31 日前出票可能避開 8 月 1 日起嘅加幅；票務更改、重新出票、航段同行程起點都會影響最終收費，一律以出票頁為準。唔好為咗慳 YQ 而遷就未諗清楚嘅行程。

國泰官方燃油附加費頁 ↗

官方公佈：2026-07-24・生效：2026-08-01・AcreMiles 最後核實：2026-07-24。本文只覆蓋國泰官方公佈嘅香港出發燃油附加費；夥伴航空公司、其他出發地及完整稅費總額唔喺本文範圍。

收費以國泰航空官方最新公佈及出票頁為準。借定唔借？還得到先好借！

YQ 燃油費：免費機票要俾幾多

換票必讀 · 隱藏成本

「免費機票」其實要俾幾多錢？

里數免嘅係票價，YQ 燃油費同稅要現金硬俾——出票前一定要計埋。

用里數換機票，唔代表零成本。你仲要俾 YQ（燃油附加費）＋機場稅；實際金額會受航段、行程起點、官方地區分類、生效日期、幣別同航空公司影響。

按咩計起點＋地區＋航段

完整總額出票頁確認

官方檢視每兩星期

YQ 到底係咩

YQ ＝燃油附加費（Fuel Surcharge），係航空公司喺票價以外另收嘅一筆，用嚟對沖油價。里數換票只係免咗「票價（fare）」嗰部分，YQ 同各種機場稅、離境稅係免唔到嘅，一律要現金找。

所以「用里數換免費機票」呢句，嚴格上嚟講唔完全啱——應該係「用里數換到唔使俾票價嘅機票，但仲要俾 YQ ＋稅」。

點樣安全查實

燃油附加費按航段、行程起點及官方地區分類計；同一段路亦可能因航空公司、生效日期或幣別而唔同。AcreMiles 現有資料未足以完整建模，所以 Preview B 暫停自動總額估算。

環球票要特別留意

環球票飛好多段，每段都可能有 YQ。所以砌環球票唔淨係睇里數；規劃器只計已核實嘅里數規則，YQ 同稅要去出票頁睇實數。

安全做法：先列清楚每段起點、終點、航空公司同出票日期，再用官方資料／出票頁逐段核對。AcreMiles 唔會用單一距離門檻扮成官方地區分類。

燃油附加費按航段、行程起點及地區計算，最終以出票頁為準。國泰會每兩星期檢視及修訂燃油附加費。

官方查證：國泰官方燃油附加費頁 ↗

常見問題

YQ 係按咩計？

按航段、行程起點、官方地區分類、生效日期、幣別同航空公司計；最終以出票頁為準。

點解規劃器唔顯示估算？

現有資料未足以完整建模。用距離門檻代替官方地區分類會造成假精確，所以 Preview B 暫停自動總額。

YQ 幾時要畀？

出票嗰陣以現金畀；國泰每兩星期檢視及修訂，請按官方最新公佈同出票頁確認。

延伸閱讀

燃油附加費、稅項同細節以各航空公司及國泰亞洲萬里通條款為準，以官網公佈為準；金額跟油價浮動。

渣打國泰 7 月最新迎新優惠+抽獎、邊度申請最著數？

資料更新 · 2026-07-26

官方迎新、抽獎、渠道賞唔好撈埋

綠卡官方 base welcome 至 7 月 30 日；盲盒抽獎已於 7 月 23 日完結；部分平台固定賞延至 7 月 31 日。

舊「高達 143,000 里」係渠道 headline，混合銀行迎新、開戶、渠道聲稱同隨機盲盒，唔係每人保證攞到。以下按 2026-07-23 已核實資料拆開。

加碼點砌

銀行 base welcome — 綠卡累積簽 $5,000／$40,000／$110,000，總數 10,000／20,000／40,000 里；申請期至 7 月 30 日。

官方 referral channel — 被推薦新客 10,000 里、現有客 5,000 里；互斥／疊加按官方條款。

平台固定賞 — 只可由平台自己頁面證明，唔會改寫銀行迎新規則。

盲盒抽獎（已完結） — 2,000 至 364,000 里屬隨機結果，已於 7 月 23 日完結，保留作 Historical，唔計入 deterministic Result。

申請前要逐項對條件；「高達」唔等於固定可得。

申請渠道逐項拆

小斯（07-15 至 31，碼 HKRSIUC11000）：HK$500 Apple Store／超市禮券，完整領獎 mechanics 仍標 partial。里先生（已完結）（至 07-23，碼 HKRMRM11000）：歷史記錄最高 88 MM Credit——38 只限新會員，另外 50 要成功批卡及填表。MoneySmart（平台禮品至 07-31）：新客免簽賬揀 HK$900 電子券，或平台標價 HK$3,980／2,100／1,970 實物；銀行盲盒係另一項已完結抽獎，只接受 07-23 或之前申請並於 08-13 前批卡。

⚠️ 三件套提醒：迎新窗口只有 2 個月（比一般短）；渣打通病係好多優惠要預先登記；DCC 揀港幣結算嘅海外簽賬唔計數仲要多畀 1%。

最新渠道資料：

渠道名單、獎賞、條件同連結只按最新核實資料顯示；未通過核實嘅內容會保持隱藏。

張卡本身

年薪要求HK$96,000（官方申請資格）

年費首年免・次年 $2,000

年費豁免合資格優先／Premium 理財或出糧戶口客戶
HK$96,000 係年薪要求，唔係簽賬豁免門檻

日常賺率食肆酒店 $4/里・其他本地 $6・海外 $4

國泰／香港快運HK$2/里

里數入賬Asia Miles 每月自動入・免手續費

👍 優點

全城唯一國泰聯營卡，里數自動入賬唔使手動換
現行 base welcome 有三級選擇
食肆＋酒店 $4/里，日常都企得住
首年免年費

👎 缺點

迎新窗口只有 2 個月，簽唔切就蝕
渠道、開戶同抽獎條件唔同，唔可以只睇 headline
海外簽賬記住揀當地貨幣——DCC 揀港幣唔計分仲貴 1%
最高迎新層要簽 $110,000，門檻唔細

常見問題

乜嘢先算新客？

現時冇持有渣打／MANHATTAN 主卡，而且申請前 6 個月冇取消；每人只可一份迎新。

143,000 里係咪保證？

唔係。舊 headline 混合多個條件同盲盒隨機獎賞；固定可得部分要按銀行及所選渠道逐項核對。

迎新要幾耐內簽完？

批卡後 2 個月；現行申請期至 7 月 30 日，最遲 10 月 31 日發卡。

延伸閱讀

資料截至 2026-07-23；銀行規則以渣打官方產品頁／T&C，平台固定賞以各平台自己頁面為準。渠道 headline 唔會取代銀行條款。借定唔借？還得到先好借！

匯豐EveryMile 8月最新優惠

限時加碼 · ⏰ 08-31 截

簽 $25,000，換到兩程亞洲來回

MoneySmart 加碼 8 月 31 日截。

官方迎新 HK$1,250 獎賞錢，1 蚊兌 20 里即 25,000 里。經 MoneySmart 入再多 HK$1,000，變 45,000 里——每里成本由 $1.00 跌到 $0.56。同一筆簽賬，撳邊度真係有分別。

滙豐 EveryMile 信用卡 8 月迎新：簽 HK$25,000 攞 45,000 里

兩個入口，攞到嘅數唔同

全新滙豐信用卡客戶，發卡後首 60 個曆日簽夠 HK$25,000：

經滙豐官方（網站／個人網上理財／HSBC HK App）→ HK$1,250 獎賞錢＝ 25,000 里

經 MoneySmart，申請時輸入 MARTFLASH → HK$1,250 ＋額外 HK$1,000 ＝ 45,000 里

現有客經 MoneySmart 入 → 額外 HK$500 ＝多 10,000 里

滙豐官方25,000 里（每里 $1.00）

MoneySmart · MARTFLASH45,000 里（每里 $0.56）

45,000 里等於兩程亞洲來回。日本經濟來回標準獎勵，餘 19,000 再飛台北來回 14,000 有找。一筆 HK$25,000 簽賬換兩程機票。

只入到官方嗰 25,000 都唔差。日本來回差 1,000 里——呢 1,000 里用交通類 HK$2/里簽 HK$2,000 就補返，搭一個月車就夠。

HK$25,000 呢個門檻唔算低。想知呢筆錢分去幾張卡好定集中一張好——

⚠️ 官方迎新必須經滙豐指定官方渠道申請——網站、個人網上理財或 HSBC HK App。呢點寫死喺官方條款。MoneySmart 嗰筆額外係平台加碼，兩邊條款分開，各自要符合。

仲有一筆 HK$200，但條件完全唔同

全新滙豐信用卡客戶，發卡後首 60 個曆日內成功申請現金套現分期計劃，獲批提取金額不少於 HK$20,000、還款期不少於 12 個月 → 額外 HK$200 獎賞錢（4,000 里）。

你會喺其他地方見到「HK$1,450」——嗰個係官方 HK$1,250 加埋呢筆 HK$200。一個係簽夠錢，一個係要做分期計劃，分開達成。簽夠 HK$25,000 唔會自動有嗰 HK$200。

同上一期比

官方 base 冇變：HK$25,000 → HK$1,250 獎賞錢，去到 2027 年 2 月 28 日。分別喺渠道加碼。七月係官方 HSBCFLASH 派額外 HK$1,000，7 月 31 日已完；八月接力嘅係 MoneySmart 嘅 MARTFLASH，數一樣係 HK$1,000，但要經 MoneySmart 入。

除咗迎新，日常都有嘢賺

海外簽賬 HK$2/里 — 至 2026 年 12 月 31 日。要喺 HSBC Reward+ App 登記，每個推廣階段合資格海外淨簽賬達 HK$12,000 或以上先計

交通類 HK$2/里 — 日常搭車都儲到，補迎新差額最快就係呢度

一般簽賬 HK$5/里

最新渠道資料：

渠道名單、獎賞、條件同連結只按最新核實資料顯示；未通過核實嘅內容會保持隱藏。

攞盡佢，記住呢幾樣

官方迎新一定要經滙豐官方渠道申請，條款寫死

60 個曆日簽夠 HK$25,000，由發卡日起計，唔係兩個月

想要 MoneySmart 加碼就要 8 月內入，同時輸入 MARTFLASH

海外 HK$2/里要喺 Reward+ App 登記，唔登記係 HK$5/里

現金套現分期嗰 HK$200 係獨立條件

附屬卡申請人唔適用迎新

張卡本身

年薪要求HK$240,000

年費首年免

一般簽賬HK$5/里

交通HK$2/里

海外（登記＋達標）HK$2/里

迎新兌換HK$1 獎賞錢 = 20 里

常見問題

經 MoneySmart 入，官方迎新仲有冇？

有。官方 HK$1,250 照計，MoneySmart 嗰 HK$1,000 係額外加上去。兩邊條款分開，各自要符合條件。

HK$1,450 同 HK$1,250 邊個啱？

兩個都係真數，但唔係同一件事。HK$1,250 係簽夠 HK$25,000 攞嘅官方迎新；另外 HK$200 要你做現金套現分期、提取不少於 HK$20,000、還款期不少於 12 個月。想攞齊就兩樣都要做。

60 個曆日簽唔夠 HK$25,000 點算？

就攞唔到。呢張卡係一次性門檻，冇分層。門檻高過你今期消費嘅話，講咗點揀門檻啱自己嗰張。

延伸閱讀

資料截至 2026-08-04，按滙豐官方條款核實。條款隨時改，申請前請自行核對官方最新公佈。借定唔借？還得到先好借！

AE 白金新一期：132 萬分分兩段派

迎新 · ⏰ 08-31 截

132 萬分，分兩段派足一年半

申請期 8 月 31 日截。

首 6 個月簽夠 HK$60,000 攞 660,000 分；養住張卡到第 15–17 個月做一宗任何金額交易，再攞 660,000 分。加埋 1,320,000 分，約 73,000 里。

兩段式迎新，時間拉足一年半

新基本卡會員：

首 6 個月累積合資格簽賬 HK$60,000 → 660,000 分

持卡第 15–17 個月完成一宗任何金額合資格交易 → 再 660,000 分

合資格現有基本卡會員：同樣兩段，每段 320,000 分，共 640,000 分。

第一段真正嘅價錢：$9,500 買 66 萬分

呢張卡首年年費 HK$9,500 係必須繳付先算數——唔係「首年免」，係要俾。所以第一年嘅算式好簡單：用 HK$9,500 買 660,000 分，約 36,000 里，即每里 $0.26。

第一段　簽 $60,000 ＋年費 $9,500660,000 分（每里約 $0.26）

第二段　第 15–17 個月做一宗交易再 660,000 分

兩段合共1,320,000 分（約 73,000 里）

第二段係全張卡最抵嗰段。金額冇要求——第 15 至 17 個月隨便簽一次就有 660,000 分。即係話第二段唯一成本係次年年費，唔使再谷簽賬。

但你要養住張卡足足一年半。中間 cut 咗，第二段就冇。想睇同一筆錢分去幾張卡定集中呢張——

同上一期比

七月嗰期係 100 萬分＋9X 續期，一次過派。今期改成兩段式 132 萬分——總數多咗，但攞齊要一年半，唔似上期咁快埋單。想快嘅上期著數，想攞多啲嘅今期著數。

申請資格逐項

須繳付首年年費 HK$9,500

須符合 12 個月新基本卡會員定義

申請時不得持有白金卡或半島白金卡

過去 12 個月不得取消任何香港美國運通基本卡

💡 八達通嗰項係另一條數：批卡後首 3 個月以本卡或附屬卡為手機八達通單次增值 HK$600 或以上，有額外獎賞——獨立條件，唔屬於上面 132 萬分。你喺其他地方見到「144 萬分」，就係將呢個加碼撈埋上去。

張卡本身：除咗迎新，日常賺率

本地簽賬HK$9/里

海外（每月首 $5,000）HK$2/里

海外（超出部分）HK$4.5/里

超市（每月首 $5,000）HK$2/里

海外同超市兩個高率類別各有每月 HK$5,000 上限，超出即刻跌返基本率。呢張卡日常賺率唔算突出，價值集中喺迎新。

最新渠道資料：

渠道名單、獎賞、條件同連結只按最新核實資料顯示；未通過核實嘅內容會保持隱藏。

攞盡佢，記住呢幾樣

年費 HK$9,500 要俾咗先計數，唔係豁免

首 6 個月簽夠 HK$60,000，平均每月 HK$10,000

第二段要養住張卡到第 15–17 個月，中間 cut 咗就冇

申請時唔可以持有白金卡或半島白金卡

過去 12 個月唔可以 cut 過任何香港 Amex 基本卡

海外同超市高率各有每月 HK$5,000 上限

常見問題

年費 HK$9,500 值唔值？

第一段 660,000 分（約 36,000 里）除以 HK$9,500，每里約 $0.26——單計呢一段係抵嘅。但你要簽夠 HK$60,000，而且養住張卡先攞到第二段。

第二段真係要等一年半？

係。官方寫明係持卡第 15 至 17 個月完成一宗任何金額合資格交易。金額冇要求，但時間窗口固定，過咗就冇。

同 AE Explorer 邊張啱我？

Explorer 首年免年費、門檻 HK$8,000 起，適合唔想俾年費嘅人；白金卡年費 HK$9,500 但迎新大好多，適合一筆過大額消費。講咗點分。

延伸閱讀

資料截至 2026-08-04，按美國運通官方條款核實。文中 73,000 里係按同一積分計劃下 Explorer 官方條款嘅 18:1 比率推算；積分兌里數比率同上限以當期積分計劃條款為準。條款隨時改，申請前請自行核對官方最新公佈。借定唔借？還得到先好借！

AE Explorer 26,000 里：登記咗先有全年 6X

迎新 · ⏰ 08-31 截

簽 $30,000，日本來回啱啱好夠

申請期 8 月 31 日截。

簽夠 HK$30,000 攞 26,000 里——日本經濟來回標準獎勵就係 26,000，一里都唔使補。門檻低嗰層簽 HK$8,000 都有 8,000 里。首年免年費。

AE Explorer 迎新：簽 HK$30,000 攞 26,000 里，啱啱好日本來回

除咗迎新，仲有幾樣

本地簽賬 6 分／HK$1 — 18:1 兌換即 HK$3/里，去到 2027 年 6 月 30 日。要登記

外幣及旅遊簽賬最高 10.75 分／HK$1 — 低至 HK$1.68/里，至 2026 年 12 月 31 日。要登記，有每季上限，超出跌返 HK$4.8/里

八達通 HK$50 簽賬回贈 — 首三個月手機八達通單次增值 HK$600。獨立條件，唔屬於迎新

外幣 HK$1.68/里係全港第一梯隊。有旅行計劃嘅，呢張卡出去簽最抵——但記住有每季上限，超出部分即刻跌到 HK$4.8/里，出發前計清楚要簽幾多。

迎新分兩層，兩層都平

第一層　簽 $8,0008,000 里（每里 $1.00）

第二層　簽 $30,00026,000 里（每里 $1.15）

呢張卡罕有喺第二層仲抵。由 $8,000 簽到 $30,000，多簽 $22,000 換多 18,000 里——每里 $1.22。大部分卡第二層即刻跳上 $3 以上，呢張唔會。

即係話：如果你今期本身就要簽三萬蚊，唔好停喺第一層。反而簽超過 $30,000 之後就冇再加，嗰部分應該分去第二張卡——

⚠️ 26,000 里有個前提：要登記。官方條款寫明呢個總數已經包含須登記嘅本地簽賬加速積分，唔可以再同基本簽賬分重複計算。唔登記就攞唔到 26,000。登記免費，批卡之後即刻做，唔好等。

最新渠道資料：

渠道名單、獎賞、條件同連結只按最新核實資料顯示；未通過核實嘅內容會保持隱藏。

攞盡佢，記住呢幾樣

批卡之後即刻登記，唔登記攞唔到 26,000 里

要經指定網上連結申請，唔係隨便入官網就得

過去 12 個月唔可以有任何香港 Amex 基本卡

外幣高率有每季上限，超出跌返 HK$4.8/里

八達通嗰 HK$50 係獨立條件，首三個月單次增值 HK$600

本地高率去到 2027 年 6 月，外幣高率 2026 年 12 月完

張卡本身

年薪要求HK$120,000

年費首年免

本地（登記後）HK$3/里

外幣及旅遊（登記後）低至 HK$1.68/里

機場 Lounge有

申請期至 2026-08-31

常見問題

唔登記會點？

攞唔到 26,000 里。官方條款寫明呢個總數包含須登記嘅加速積分。登記免費，批卡後即刻做。

外幣 HK$1.68/里有冇上限？

有每季上限，超出部分按官方條款跌返 HK$4.8/里。出發前計清楚要簽幾多，超額嗰部分放去第二張卡。

簽夠 $30,000 之後仲應唔應該用呢張？

本地 HK$3/里唔算特別突出，但外幣 HK$1.68/里好抵。旅行繼續用，本地日常可以分去賺率高啲嘅卡——講咗點分。

延伸閱讀

資料截至 2026-08-04，按美國運通官方條款核實。條款隨時改，申請前請自行核對官方最新公佈。借定唔借？還得到先好借！

三大平台獨家獎賞點樣拎？

實戰教學 · 週更專欄

同一張卡，識行流程多幾百蚊

小斯、里先生、MoneyHero 嘅獨家獎賞唔係自動有——流程行錯一步就冇。

申請信用卡經比較平台指定連結行，銀行迎新之外通常有平台獨家獎賞（禮券／現金／里賞金）。三個平台機制唔同，呢篇一次過講清楚。

三家機制速記

小斯（flyformiles） — 靠 cookie 追蹤——撳咗佢條 link 之後唔好再撳其他網站嘅申請連結、唔好用無痕模式、唔好開 adblock、唔好用公司電腦；部分卡要另外填 Google Form。

里先生（MrMiles） — 會員平台制——申請完要去佢平台填 form；「最高 88 MM Credit」當中 38 只限新會員，另外 50 要成功批卡及填表。

MoneyHero — 要逐個 offer 睇換領流程；部分 offer（例如 AE Platinum）要求收到 email 後 7 日內交表，唔可以當所有卡都係同一期限。

通用鐵律

同一張卡通常只可以揀一個平台嘅獨家獎賞，唔好貪心撳晒三條 link（cookie 會打架）。

截圖留底：申請成功頁、日期、申請編號。

先分獎賞來源：平台固定賞要搵平台；issuer-linked／銀行迎新要按銀行條款。渠道頁 headline 唔代表全部由平台派。

平台數字同官方有出入時，銀行規則一律以官方 T&C 為準。

📢 快訊：Mox 9 月變陣。Mox 信用卡由 2026-09-01 起，出糧唔再解鎖 HK$5=1 里／2% CashBack（以後要 Mox+ 先解鎖；未解鎖係 $10=1 里）。用開 Mox 儲里嘅朋友要重新計數。

三大平台官網：里先生 MrMiles ↗小斯 FlyForMiles ↗MoneyHero ↗

以上為第三方公開連結，方便你自行前往；本 app 現時冇任何 referral／聯盟收益（見「關於」利益披露）。實際優惠、細則一律以該平台及銀行官方最新公佈為準。

常見問題

三個平台可唔可以一齊撳晒？

唔好——同一張卡通常只可以揀一個平台嘅獨家獎賞，cookie 會打架，隨時三邊都攞唔到。

獎賞係邊個派？

要睇記錄分類：fixedBonus 係平台固定賞；issuerOfferClaim 係渠道轉述嘅發卡行獎賞，銀行規則仍以官方 T&C 為準。

申請完仲要做啲乜？

截圖留底（成功頁、日期、申請編號）；里先生同 MoneyHero 仲要照佢哋流程填 form 先有得領。

延伸閱讀

資料截至 2026-07-23；平台固定賞、發卡行轉述優惠同銀行迎新已分開標示。申請前請再核對平台及銀行最新條款；借定唔借？還得到先好借！

渣打國泰簽 $5,000：用啱連結多 15,000 里

限時加碼 · ⏰ 08-31 截

簽 $5,000，一張日本來回喺手邊

加碼 8 月 31 日截，仲有成個月。

簽夠 HK$5,000，經國泰網站入，攞 25,000 里——夠飛台北來回仲有找。同一張卡由渣打網站入係 10,000 里。所以撳邊條連結，真係有分別。

渣打國泰 Mastercard 經國泰網站申請簽 $5,000 攞 25,000 里，換日本來回機票

唔同 link 申請，迎新獎賞會唔同

全新信用卡客戶，發卡後兩個月內簽夠 HK$5,000：

經國泰網站 ↗申請 → 25,000 里（銀行迎新 10,000 ＋國泰加碼 15,000）

經渣打網站申請 → 10,000 里

簽 $5,000，一張日本來回已經喺手邊。日本來回標準獎勵經濟艙 ——25,000 差 1,000。而申請批咗自動有一次抽獎，七百萬份係 2,000 里，名額多到基本上有份。加埋就係 27,000 里，日本來回入袋。

就算抽獎唔計，25,000 里都夠飛台北來回（14,000 里）有找，仲餘 11,000。

想食呢個加碼，三件事要啱：8 月 31 日前經國泰網站申請、9 月 21 日前批到卡、發卡後兩個月內簽夠 $5,000（外幣簽都計，會折做港紙）。

💡 提早知：呢 15,000 里唔係即刻入，係 2027 年 2 月尾之前入你國泰戶口。到時冇收到，記得三月底前打去國泰追。里數入賬同過期呢類位，講得更齊。

迎新分三層，第一層最抵

第一層　簽 $5,00010,000 里（每里 $0.50）

第二層　簽 $40,00020,000 里（每里 $2.00）

第三層　簽 $110,00040,000 里（每里 $2.75）

第一層：$5,000 攞 10,000 里。每里 $0.50，加埋國泰加碼變 $0.20。呢層係全張卡最抵嗰段，簽夠就攞足。

再簽落去：每里變 $3.50。由 $5,000 簽到 $40,000，多簽 $35,000 換多 10,000 里；再簽到 $110,000，多簽 $70,000 換多 20,000 里。兩段都係每里 $3.50。

所以簽夠 $5,000 之後，其餘簽賬放去賺率好啲嘅卡通常划算啲——

除非你係優先理財客戶——嗰邊第三層係 100,000 里（每里 $1.10）；優先私人理財更加係 120,000 里（每里 $0.92）。大額專登用呢張卡就抵。

一般（綠卡）10,000 ／ 20,000 ／ 40,000

10,000 ／ 30,000 ／ 100,000

10,000 ／ 40,000 ／ 120,000

三張卡第一層完全一樣：$5,000 = 10,000 里。入門玩法人人平等。

計數要記住：迎新係「補足到」嗰個數

呢張卡日常簽賬本身每 $6 賺 1 里。但迎新條款寫明：迎新里數已經包咗你日常賺嗰啲。

官方例子：迎新總數 15,000 里，你簽賬已經賺咗 1,000，銀行就補返 14,000。

所以計自己攞幾多，睇迎新嗰個數就得——簽 $110,000 就係 40,000 里，唔使再加基本率上去。咁計出嚟嗰個數，先係真正入袋。

除咗迎新，仲有幾樣

國泰加碼 15,000 里 — 8/31 前經國泰網站 ↗申請、簽夠 $5,000

推薦朋友 — 7/1–9/30，每個成功推薦 5,000 里，最多 100,000

國泰夥伴餐廳 — 綁咗卡，單一消費滿 HK$300 送 500 里，做到 9/15

大抽獎 — 申請批咗自動有份，唔使登記

100 萬里1 份

Apple 禮品卡 $10,00025 份

54,000 里150 份

26,000 里200 份

18,000 里200 份

14,000 里1,000 份

2,000 里7,000,000 份

睇清楚：七百萬份係 2,000 里，名額大到基本上人人有。抽中 2,000 里，加埋國泰嗰 25,000 就係 27,000——啱啱好過日本來回 26,000。

當佢係「申請送 2,000 里」就啱，中到上面啲當賺。11 月 9 日抽，11 月 16 日公佈，里數 12 月 15 日前入。

同上一期比

銀行迎新三層一模一樣：10,000／20,000／40,000，冇加冇減。今期分別係——多咗國泰加碼 15,000 里；申請期做足 51 日（7/31–9/20），批卡死線去到 12 月 31 日，唔使趕；抽獎換咗新一輪。

⏰ 兩個死線唔同，好易搞錯：想食國泰加碼 15,000 里 → 9 月 21 日前要批到卡；想有抽獎份 → 10 月 11 日前批到卡就得。八月底先申請、九月尾先批卡嘅話：抽獎有份，15,000 里冇份。

官方申請：國泰網站 · 渣打國泰 Mastercard 申請頁 ↗

最新渠道資料：

渠道名單、獎賞、條件同連結只按最新核實資料顯示；未通過核實嘅內容會保持隱藏。

攞盡佢，記住呢幾樣

簽賬窗口兩個月，由發卡日起計。卡到手即刻開始簽

申請時要揀定邊個迎新，揀完改唔到

要有國泰會員號，資料填準確——里數靠佢入賬，填錯會冇咗

日常簽賬賺嘅里，月結單後大約兩星期入賬。過咗十四個工作日仲未見，一個月內打 2886 4111 追

每人只可攞迎新一次，唔理申請幾多張

新客定義：而家冇渣打卡，而且過去 6 個月內冇 cut 過渣打或 MANHATTAN 主卡

計入迎新嘅要係買嘢消費——現金透支、保費、交稅、繳費、轉數快、八達通自動增值唔計

兩樣真金白銀：一年內 cut 卡，銀行同國泰都有權收返；海外簽賬揀港幣結算（DCC）唔計迎新，仲要多畀 1%。

張卡本身

年薪要求HK$96,000

年費首年免・次年 $2,000

食肆・酒店HK$4/里

其他本地HK$6/里

海外HK$4/里

國泰・香港快運HK$2/里

里數入賬每月自動入 Asia Miles・免手續費

全城唯一國泰聯營卡——賺到嘅里自動入賬，唔使自己手動兌換。八達通自動增值日常都計賺里（但唔計入迎新）。

常見問題

經國泰網站同渣打網站入，張卡有咩分別？

同一張卡、同一套銀行迎新。分別係國泰網站 ↗呢期有加碼 15,000 里（8/31 截，簽夠 $5,000，9/21 前要批到卡）。加碼由國泰派，銀行條款照舊。

咩叫優先理財？我算唔算？

優先理財（Priority Banking）同優先私人理財（Priority Private）係渣打嘅財富管理級別，唔係申請信用卡時自己揀得到。呢兩級嘅國泰卡係獨立產品。

最實在嘅分別係國泰貴賓室：優先理財有 4 次商務貴賓室，優先私人理財有 2 次頭等＋ 8 次商務——而且可以同同行旅伴分享，唔止自己用。

年費：優先理財 $4,000（每月維持 $100 萬平均結餘可免）；優先私人理財 $8,000（$800 萬）。想知自己夠唔夠，撳去渣打官方頁睇。

夠嘅話呢兩張抵好多。唔夠都唔緊要——三張卡第一層完全一樣，$5,000 = 10,000 里。

簽 $110,000 攞 40,000 里，值唔值？

一般客每里 $2.75，唔算特別抵——同一筆錢分去幾張卡食迎新通常好啲，講咗點分。優先理財攞 100,000 里、優先私人理財 120,000 里就好抵。

延伸閱讀

資料截至 2026-08-01，全部按渣打及國泰官方條款核實。條款隨時改，申請前請自行核對官方最新公佈。借定唔借？還得到先好借！

Citi PremierMiles 簽 $5,000：全港最低門檻嗰批

迎新 · ⏰ 09-30 截

簽 $5,000 攞 20,000 里，每里 $0.25

推廣期 9 月 30 日截。

首兩個月簽夠 HK$5,000 攞 240,000 Citi 分，12 分兌 1 里即 20,000 里——台北來回 14,000 里就換到，仲餘 6,000。每里成本 $0.25。

三條門，數唔同

Citi 官方 → 20,000 里

指定銀行客戶渠道 → 官方迎新之外，另有現金回贈：簽 HK$5,000–24,999 得 HK$1,600；簽 HK$25,000 以上得 HK$2,500

里先生 → 最高 88 MM Credit（新會員 38 ＋成功批卡後按要求填表 50），至 9 月 30 日

現金回贈唔換算做里數。我哋唔會幫你當成「等於幾多里」——兩樣嘢性質唔同，分開睇先準。平台獎賞同樣唔加入銀行官方迎新總數。

銀行客戶渠道嘅回贈只限合資格客戶。想知自己算唔算，撳入 Citi 官方頁自己睇門檻——睇完唔夠都唔緊要，官方嗰 20,000 里三條門都一樣有。

呢個門檻有幾低

簽 $5,00020,000 里（每里 $0.25）

用日常賺率追返同樣里數要簽 $160,000

呢張卡本地賺率係 HK$8/里。想靠日常簽賬儲夠 20,000 里，你要簽足 HK$160,000。而迎新只要 HK$5,000——差 32 倍。

五千蚊係咩概念：一部手機、一次裝修訂金、一張長途機票。基本上你今個月本身都會簽到。

所以呢張卡嘅玩法好清楚：攞完迎新，日常簽賬應該分去賺率好啲嘅卡——

⚠️ 最易 fail 嘅位唔係金額，係「每個月最少一宗合資格交易」。兩個月都要有。第一個月一炮過簽晒五千蚊、第二個月完全唔用張卡——就唔符合。第二個月隨便簽杯咖啡都得，但一定要簽。

最新渠道資料：

渠道名單、獎賞、條件同連結只按最新核實資料顯示；未通過核實嘅內容會保持隱藏。

張卡本身：除咗迎新，日常賺率

本地HK$8/里

海外HK$4/里

年費首年免

攞盡佢，記住呢幾樣

首兩個月簽夠 HK$5,000

每個月至少一宗合資格交易，兩個月都要有——呢個先係最易漏嘅位

12 分兌 1 里，國泰或 British Airways Club 都得

現金回贈同里數係兩件事，唔好加埋當一個數

銀行客戶渠道嘅回贈只限合資格客戶，入去睇清楚門檻

里先生 88 MM Credit 要批卡後填表，唔會自動有

常見問題

HK$1,600 現金回贈同 20,000 里可唔可以一齊攞？

現金回贈只限指定／合資格銀行客戶渠道，同官方迎新係分開兩份條款。合資格嘅話兩樣都拎得到，但要各自符合條件。撳入官方頁睇自己算唔算。

門檻咁低，係咪有伏？

金額真係低。實際會 fail 嘅係「每個月最少一宗合資格交易」同 Citi 新客定義——呢兩樣先要留意。

攞完之後應唔應該 cut 卡？

唔好。大部分迎新 12 個月內取消張卡，銀行有權扣返。詳情去。

延伸閱讀

資料截至 2026-08-04，按 Citi 官方條款核實。條款隨時改，申請前請自行核對官方最新公佈。借定唔借？還得到先好借！

中銀 Cheers Visa Infinite：簽賬期比你以為長

迎新 · 12-31 截

簽 $12,000 攞 15,000 里，仲有近三個月時間

推廣期到年底。

簽夠 HK$12,000 攞 225,000 積分，15 分兌 1 里即 15,000 里——台北來回 14,000 里就換到。每里 $0.80。而且簽賬期唔止兩個月。

月頭發卡，實際多成三個星期

官方寫法係「發卡當月及其後的首兩個曆月」，唔係「首兩個月」。呢個分別好實際。

官方例子：1 月 8 日發卡 → 簽賬期去到 3 月 31 日，即 83 日

如果 1 月 30 日發卡，簽賬期一樣係到 3 月 31 日，得 61 日

兩者差成三個星期。想鬆動啲，申請時間可以計一計——月頭攞到卡最著數。

迎新會喺發卡當月起其後四個曆月內誌入主卡賬戶。

兩張 Cheers，數唔同

Cheers Visa Infinite　簽 $12,000225,000 分＝ 15,000 里（每里 $0.80）

Cheers Visa Signature　簽 $10,000150,000 分＝ 10,000 里（每里 $1.00）

推廣期由即日起至 2026 年 12 月 31 日，仲有成半年。

呢張卡唔計嘅簽賬特別多

計：零售簽賬、Apple Pay／Google Pay／Samsung Pay。

唔計（官方逐項列明）：BoC Pay+／AlipayHK／WeChat Pay HK 等電子錢包、積 FUN 錢、現金提現同透支、繳費至其他信用卡或私人貸款、自動轉賬、八達通增值同自動增值、所有分期付款、年費同財務費用、公共事務費用（稅款、通訊費、會費、學費、租金、水電）、PayPal 同支付寶等網上支付繳費、儲值卡充值、P2P 轉賬、金融產品交易（存款、外匯、保險、基金、股票、樓宇買賣）、賭博、慈善及非牟利機構。

⚠️ 想用大額繳費衝門檻嘅要留意——保費、稅、學費、租金全部唔計。要靠日常零售同餐飲砌夠 HK$12,000。交易以交易日期計，而且要喺交易日後 7 天內成功誌賬，月尾先簽有風險。主卡同附屬卡合併計算。

十二千蚊唔算細數，而且可用類別窄。想睇呢筆錢分去幾張卡好啲定集中一張——

申請前要知：兩張 Cheers 之間會自動轉

申請 Visa Infinite 唔獲批，中銀可以改發 Visa Signature 畀你

已經有 Signature 再申請 Infinite：Signature 賬戶如果冇未償還分期，會即時取消——附屬卡、自動轉賬、八達通自動增值等服務一併終止（結欠同積分自動轉去 Infinite）

如果有未償還分期，兩張卡會同時保留

已經有 Infinite 再申請 Signature，中銀唔會處理

第二點最易中招。如果你張 Signature 綁咗八達通自動增值或者出糧自動轉賬，升級之後會一併停——記得申請前先安排好，批咗之後重新設定。

新客定義

唔適用於現有中銀港幣信用卡或雙幣卡主卡持卡人，亦唔適用於申請日期前 12 個月內取消過上述卡嘅人。附屬卡、商務卡、Intown 網上卡、美金卡、澳門發行嘅中銀卡、私人客戶卡唔計數。

推廣期內同時成功申請兩張或以上中銀卡，只可獲一項迎新。

年費要計埋

Visa Infinite　主卡HK$3,800

Visa Infinite　附屬卡HK$1,900

Visa Signature　主卡HK$2,000

官方產品資料概要冇列明首年豁免安排。申請前直接向中銀確認當期有冇年費豁免——呢個數直接影響你嘅每里成本。有豁免嘅話每里 $0.80；冇豁免就係另一回事。

最新渠道資料：

渠道名單、獎賞、條件同連結只按最新核實資料顯示；未通過核實嘅內容會保持隱藏。

攞盡佢，記住呢幾樣

簽賬期係發卡當月＋其後兩個曆月，月頭發卡多成三個星期

大額繳費類全部唔計，要靠零售同餐飲砌夠 HK$12,000

交易後 7 天內要誌賬，月尾先簽有風險

同時申請兩張中銀卡只得一份迎新

申請前確認年費豁免安排，HK$3,800 唔係小數

已有 Signature 申請 Infinite 會令 Signature 即時取消，附屬卡同自動轉賬一併停

12 個月內 cut 卡會扣返，積分唔夠按 25,000 分 = HK$100 折現

張卡本身

外幣交易另收 1.95%

零售實際年利率最高 35.70%

免息期最長 56 天

積分兌換15 分 = 1 里

推廣期至 2026-12-31

常見問題

簽賬期到底幾長？

發卡當月加其後兩個曆月。官方例子：1 月 8 日發卡就去到 3 月 31 日，83 日。愈早喺月頭攞到卡，實際可用時間愈長。

可唔可以用交稅或者交保費衝門檻？

唔可以。官方條款明確剔除稅款、保費、學費、租金、水電等繳費類，連八達通增值同電子錢包都唔計。

攞完迎新想 cut 卡得唔得？

發卡後 12 個月內取消主卡，中銀有權扣回迎新積分；賬戶積分唔夠就按 25,000 分 = HK$100 折現扣錢。講埋其他銀行點做。

延伸閱讀

資料截至 2026-08-04，按中銀信用卡官方迎新獎賞條款及產品資料概要核實。條款隨時改，申請前請自行核對官方最新公佈。借定唔借？還得到先好借！

Mox Credit 免外幣手續費至年底：可能比迎新仲值錢

迎新 · ⏰ 08-31 截

兩個任務 26,000 里，外幣手續費免到年底

邀請碼名額 10,000 個，用完即止。

用邀請碼 MOXTRAVEL 開戶，簽夠 HK$10,000 攞 15,000 里（每里 $0.67），存夠 HK$100,000 再攞 11,000 里。加埋 26,000 里，啱啱好日本經濟來回。

兩筆里數，兩個任務，分開計

消費獎賞 15,000 里 — 批核日期起 60 天（獎賞期）內，用 Mox 信用卡完成合資格消費交易合共不少於 HK$10,000（唔合資格攞 Mox 卡獎賞嘅交易唔計，以官方「卡獎賞附表」為準）

存款獎賞 11,000 里 — 開戶日期起 7 天內轉入不少於 HK$100,000 到 Mox 港元活期；之後由存入期最後一日起計 59 日，每一個曆日都要維持不少於 HK$100,000

消費獎賞　簽 $10,00015,000 里（每里 $0.67）

存款獎賞　鎖 $100,000 兩個月11,000 里

兩筆合共26,000 里

兩樣分開做，做得幾多攞幾多。簽夠 HK$10,000 攞 15,000 里已經係好數，唔使存錢都有。有閒錢擺得住兩個月嘅，再多 11,000 里等於白賺。

存款獎賞會喺 2026 年 11 月 20 日或之前存入。想睇呢筆消費配唔配得埋其他卡——

⚠️ 計算期內任何一日跌穿 HK$100,000 就冇。而且定期存款戶口嘅錢唔計入港元活期結餘——想同時做定期就要留意，兩個戶口係分開計。

真正最值錢嗰樣：外幣手續費免到年底

Mox 信用卡一般外幣交易收 1.95% 手續費（Mastercard 1% ＋ Mox 0.95%）。但只要你喺消費獎賞計劃揀咗 Asia Miles，喺香港以外實體或網上商戶嘅合資格交易就豁免呢筆，跨境港幣交易手續費同樣免。有效期至 2026 年 12 月 31 日。

出一次旅行簽 $30,000 外幣慳 $585

一年簽 $100,000 外幣慳 $1,950

呢筆唔係里數，係直接唔使俾嘅錢。成日出去旅行或者網購外國嘢嘅，計落可能比迎新嗰 26,000 里仲值錢。不過要知呢個係限時推廣——正常收費係 1.95%，年底之後續唔續期，到時以官方公佈為準。

交易要喺 2027 年 1 月 14 日或之前完成結算先計。電子錢包充值（例如用 Apple Pay 增值八達通）唔合資格。

時間鏈要跟足，差一步就冇

推廣期內用邀請碼 MOXTRAVEL 開 Mox 戶口

用碼當日起 15 天內完成開戶程序（收到迎新通知嗰日＝開戶日期）

開戶日期起計嗰段期間完結前完成 Mox Credit 申請並獲批（收到批核通知嗰日＝批核日期）

批核日期起 60 天＝獎賞期，消費要喺呢段時間內做

推廣期 2026 年 4 月 1 日至 8 月 31 日，或者邀請碼用滿 10,000 次為止（以較早者為準）。先到先得，Mox 唔會公佈剩幾多名額——想入就唔好等。

仲有一樣好著數：獎賞期內即使你嘅合資格出糧交易少於 HK$25,000，Mox 都當你有 HK$25,000 嚟計 Mox Card 獎賞——即係呢 60 日自動用最高一級賺里率。

開定期存款都送里數（07-01 至 09-30）

有效國泰會員賬戶並已於 Mox 註冊，推廣期內開合資格定期存款戶口，開戶當日即收到 Asia Miles 加預付利息。

里數按你揀嘅本金金額同存款期計，實際率喺 Mox app 顯示——開戶前 app 會先話你知攞幾多里同幾多預付利息，睇清楚先落決定。只會派整數里數。

⚠️ 提早提取要小心：會扣返預付利息，另外港元定期每里扣 HK$0.2、美元定期每里扣 US$0.025，先發放餘額。即係話里數已經當你袋咗，提早走數要買返。

最新渠道資料：

渠道名單、獎賞、條件同連結只按最新核實資料顯示；未通過核實嘅內容會保持隱藏。

攞盡佢，記住呢幾樣

一定要用邀請碼 MOXTRAVEL 開戶，名額 10,000 個先到先得

開戶 15 日、批卡、簽賬 60 日——三段時間各自要跟足

存款要 7 日內入、之後 59 日每一日都維持 HK$100,000，跌一日就冇

定期存款唔計入活期結餘，唔好搞錯兩個戶口

一定要揀 Asia Miles 做消費獎賞——唔止攞里數，仲免外幣手續費（至年底）

批核後 7 天內首次轉換獎賞計劃免費，過咗要俾 HK$50

12 個月內結戶會被扣返獎賞總值

張卡本身

年費HK$0

超出信用限額手續費HK$0

退回手續費HK$0

外幣手續費1.95%（揀 Asia Miles 後豁免至 12-31）

零售實際年利率35.99%

免息期最長 56 日

現金透支3.5% 或 HK$100（較高者）

常見問題

26,000 里係咪一定攞到？

兩筆分開計。簽夠 HK$10,000 攞 15,000 里，唔使存錢都有。另外 11,000 里要你有 HK$100,000 閒錢擺得住兩個月。做得幾多攞幾多。

存款計算期跌穿咗一日會點？

就攞唔到嗰 11,000 里。條款寫明計算期內任何時間跌低於 HK$100,000 都唔會獲得存款獎賞。而且定期存款戶口嘅錢唔計入活期結餘。

免外幣手續費係咪要另外登記？

唔使登記，但一定要喺消費獎賞計劃揀咗 Asia Miles。批核後 7 天內首次由 CashBack 轉去其他計劃係免費嘅，唔好拖過咗，之後每次轉要 HK$50。

延伸閱讀

資料截至 2026-08-04，按 Mox Bank 官方推廣條款及產品資料概要核實。條款隨時改，申請前請自行核對官方最新公佈。借定唔借？還得到先好借！

滙豐 Visa Signature：網上入多 4,000 里

迎新 · ⏰ 2027-02-28 截

簽 $8,000 攞 16,000 里，每里 $0.50

申請期至 2027 年 2 月 28 日。

新客網上申請，60 日內簽夠 HK$8,000 攞 HK$800 獎賞錢，1 蚊兌 20 里即 16,000 里——台北來回 14,000 里，簽八千蚊就換到，仲有找。

最紅自主三件套要睇清楚

要登記 — 唔登記就係 HK$25/里，張卡等於冇用

要揀類別 — 額外倍數要自己指定放去邊，揀你一年入面實際簽得最多嗰類

有上限 — 2026 計劃指定類別首 HK$100,000

同一筆簽賬，撳邊度差 4,000 里

新客 · 網上申請HK$800 ＝ 16,000 里（每里 $0.50）

新客 · 官方線下渠道HK$600 ＝ 12,000 里（每里 $0.67）

現有客HK$200 ＝ 4,000 里

網上入比線下入多 HK$200，即係多 4,000 里。同一張卡、同一筆 HK$8,000 簽賬，分別只喺你由邊度入。

每里 $0.50——喺免年費嘅卡入面，呢個門檻同呢個成本都排頭幾位。八千蚊仲要係首 60 個曆日內，由發卡日起計。

想睇呢筆錢配唔配得埋其他卡一齊食迎新——

💡 仲有一筆 HK$200：全新滙豐信用卡客戶，發卡後首 60 個曆日內成功申請現金套現分期計劃，獲批提取不少於 HK$20,000、還款期不少於 12 個月 → 額外 HK$200 獎賞錢。獨立條件，同簽賬門檻分開。

你可能喺其他地方見過「HK$1,000」——嗰個係七月 HSBCFLASH 限時加碼，7 月 31 日已經完結。而家官方 base 係 HK$800。

呢張卡真正嘅玩法：最紅自主

基本賺率係 0.4% 獎賞錢，兌國泰即 HK$25/里——單睇呢個數唔好睇。但佢真正嘅玩法喺最紅自主。

唔登記（基本 0.4%）HK$25/里

登記最紅自主 · 指定類別最高 3.6%約 HK$2.78/里

差成九倍。登記最紅自主，將額外倍數放入指定類別，加埋 Visa Signature 自動額外 1.2%，指定類別最高 3.6%。

一年 HK$100,000 喺指定類別，用 HK$2.78/里計，約 36,000 里。加埋迎新 16,000，第一年可以去到五萬里以上。呢個先係「平民黑卡」個名點嚟。

最新渠道資料：

渠道名單、獎賞、條件同連結只按最新核實資料顯示；未通過核實嘅內容會保持隱藏。

攞盡佢，記住呢幾樣

一定要網上申請，線下少 HK$200（4,000 里）

60 個曆日簽夠 HK$8,000，由發卡日起計

批卡後即刻登記最紅自主，唔登記賺率差九倍

揀你實際簽得最多嗰類，上限 HK$100,000 揀啱一類就用得滿

現金套現分期嗰 HK$200 係獨立條件

首兩年免年費，其後 HK$2,000 — 續期前向滙豐確認當期豁免安排

張卡本身

年薪要求HK$240,000

年費首兩年免・其後 HK$2,000

基本HK$25/里（0.4% 獎賞錢）

指定類別（登記＋最紅自主）約 HK$2.78/里

指定類別上限2026 計劃首 HK$100,000

迎新兌換HK$1 獎賞錢 = 20 里

常見問題

基本 HK$25/里咁差，仲值唔值得攞？

值——但你一定要登記最紅自主。唔登記呢張卡冇意思；登記咗指定類別約 HK$2.78/里，喺免年費嘅卡入面算好前。迎新每里 $0.50 本身已經抵。

最紅自主要點揀類別？

揀你一年入面實際簽得最多嗰類。上限係 HK$100,000，揀啱一類就用得滿。滙豐官方頁有當期類別名單，登記前入去睇。

同 EveryMile 邊張好？

EveryMile 賺率平均、迎新門檻 HK$25,000；Visa Signature 門檻得 HK$8,000，但要靠最紅自主催谷指定類別。講咗兩張點夾埋用。

延伸閱讀

資料截至 2026-08-04，按滙豐官方條款核實。條款隨時改，申請前請自行核對官方最新公佈。借定唔借？還得到先好借！

新手最易中嘅七個伏

避坑

儲得慢唔緊要，中伏先痛

七個新手必中位，逐個拆——避晒你已叻過大部分人。

里數最痛嘅唔係儲得慢，係你以為儲到，先發現中咗伏。

① 迎新有期限有條件——要真消費：交稅、PayAll、繳費多數唔計；有啲要每月最少簽一次；T&C 逐季變，簽前對官網當期條款。

② 簽咗又 cut，啲里收返——大部分迎新 12 個月內取消張卡，銀行有權扣返。「攞完即剪卡」行唔通。

③ 里數唔等於免費——YQ＋稅要現金；燃油附加費按航段、行程起點及地區計算，最終以出票頁為準。

④ 里數會過期——戶口長期唔郁啲里會過（可透過賺取或使用延續）。辛苦儲落，過咗身乜都冇。

⑤ 計到個價 ≠ 嗰日有位——工具計到要幾多里係一件事，嗰班機有冇「獎勵位」係另一件事。用第三方查位工具睇實有位先打熱線出票。

⑥ $2 一里唔係無限咁抵——高賺率限指定商戶（Starbucks 得、酒樓唔得），仲可能有上限。睇清楚張卡個名單先。

⑦ 環球票跟最貴嗰程計——成程經濟、貪心 book 一程商務，成張票當商務——一程之差，個價爭一大截。

💡 唔想中伏：有問題撳頂部 ? 問畝里；計之前去「計算」或「規劃」，數字睇清楚先落手。

常見問題

攞完迎新即刻 cut 卡得唔得？

唔好——大部分迎新 12 個月內取消張卡，銀行有權扣返啲里。

計到個價係咪就換到？

唔係。要幾多里係一件事，嗰班機有冇獎勵位係另一件事——出票前用查位工具或者打熱線睇實。

$2 一里係咪成張卡都係？

高賺率通常限指定商戶、仲可能有上限——睇清楚張卡個名單先好簽。

延伸閱讀

所有迎新、賺率、里數同細節，受各發卡機構及亞洲萬里通條款及細則約束，以官網公佈為準。借定唔借？還得到先好借！

點用 AcreMiles 幫你計

三個問題就講晒：點賺？點換？點玩？每條問題對住一個 tab，跟住做就得。

唔使由頭睇到尾。你想做邊樣，就跳去邊段。

① 點賺？→「計算」

呢個 tab 答一條問題：我簽呢筆錢，最多榨到幾多里？

今次消費手機・結婚・裝修・買車・大旅行

日常簽賬每月固定嗰啲洗費

今次消費：六步

入金額 — 「今次大約簽幾多？」入你打算簽嘅總數。

入年薪 — 用嚟自動隔走你申請唔到嘅卡，唔會畀個計唔到嘅組合你。

揀人數 — 「一個人」定「二人家庭迎新各食一份」。二人＝同一張卡兩個人各食一份迎新，通常多一大截。

揀點洗 — 「一炮過」定「分幾個月」。影響你趕唔趕得切食到迎新嘅階梯。

揀里數 — 淨儲 Asia Miles、淨儲 Avios，或者兩樣並排比較。

撳 「計推薦組合」。

出咗結果，你會見到六樣嘢：

大字里數 — 呢個組合大約儲到幾多，連估算範圍。

每 1 里成本 — 譬如 HK$0.71。數字越細越抵。

迎新佔比 — 幾多成里數係嚟自迎新（通常七、八成）。

簽賬登機證 — 逐張卡話你知：邊張卡、簽幾多、幾時前簽完、賺幾多。呢個就係你嘅行動清單。

WHAT-IF 拉桿 — 拉一拉試「簽多啲／少啲會點」，即刻出新數。

「呢個數點計出嚟？」 — 撳開睇計算邏輯。唔係黑盒。

💡 計完記得撳「儲存呢次計劃」——會入咗「旅程」tab，返嚟隨時翻睇，唔使重新入過。

日常簽賬：四步

喺「計算」上面揀「日常簽賬」。

入你手上有邊幾張卡。

入每月各類洗費——食飯、超市、網購、外幣。唔使精確，大概就得。

出：一年大約儲到幾多、每類洗費用邊張卡最抵。

碌到最底仲有卡庫——所有卡嘅迎新、賺率、年費一撳睇齊。

② 點換？→「規劃」

儲到里數之後，呢個 tab 答：啲里換到咩？入面三個分頁——

換咩好？ — 入你而家有幾多里／分，出換到咩最抵。喺「計算」計完個數，撳一下自動填入，唔使記住個數字。

單程／來回 — 揀目的地，出經濟／特選經濟／商務／頭等各要幾多里。呢啲數逐格對過官方。

環球票 — 寰宇一家環球票。撳「示範」睇現成路線，或者自己逐段砌。

⚠️ 計到要幾多里係一件事，嗰班機有冇獎勵位係另一件事。出票前一定要上官網或者打熱線睇實有冇位。

③ 點玩？→「旅程」

你喺 app 入面儲低嘅嘢，全部喺呢度：

我儲低嘅計劃 — 喺「計算」撳過「儲存」嗰啲。

行程 — 喺「規劃」砌過嘅環球線。

收藏 — 撳過心心嘅文章。

🔒 本機優先，Google 備份可選。未登入都可以完整使用；連接後只會備份計劃、行程、收藏同少量設定。匿名統計／錯誤診斷仍只會喺你另外同意後載入。

仲有兩個 tab

優惠 — 限時迎新、加碼、優惠碼。過咗期會自動標「已完結」，唔會呃你去申請已經冇咗嘅嘢。

攻略 — 長青教學（你而家喺度）。可以用「新手／換票／路線」篩選，或者揀「最新」睇新文。

頂部三個掣

? 畝里 — FAQ 小幫手。打你想問嘅（中英都得，例：環球機票點計？），即刻出相關答案。

⋯ 更多 — 關於、外觀（淺色／深色／字體大細）、安裝到主畫面、統計開關、條款私隱。

訂閱 — 留 email 收最新優惠。

💡 裝落手機——撳 ⋯ →「安裝 App」，主畫面就會有個 AcreMiles icon。開得快啲，之前睇過嘅嘢冇網都用到。

常見問題

啲數字準唔準？

標準獎勵里數逐格對過官方（2026-07-11）；卡數據以官方 T&C／KFS 做基準。條款隨時改，申請前再對一次官網。

我啲資料存喺邊？

一定先存你自己部機；你主動連接 Google 後，指定計劃、行程、收藏同少量設定先會備份。兩邊可以獨立刪除，詳情見私隱政策。

使唔使登入？

唔使，開嚟即用；Google 登入只係可選備份。

延伸閱讀

所有迎新、賺率、里數同細節，受各發卡機構及亞洲萬里通條款及細則約束，以官網公佈為準。借定唔借？還得到先好借！

你嘅推薦卡組合

可以換到乜？（示範參考）

每類用邊張卡最抵

熱門航線參考（Reference Only）

換票唔止俾里數：仲有現金

Asia Miles vs Avios：點揀？

分有效期（示範，以官網為準）

一張票飛幾大洲——簡易定進階？

想去邊、想做乜？

優惠

攻略

AcreMiles（畝・里）係乜？

計法假設

免責聲明

資料

你張卡，一路嘥緊一張機票

里數係咩

三條路賺

換到啲乜

常見問題

買部 iPhone，換張台北來回

根本冇「最好」嘅卡

真正玩法：分工碌

年費同上限，睇清先係真賺

常見問題

淨去一個地方？呢篇夠

六個距離區（單程・經濟）

日本點解貴啲

常見問題

一張飛，玩勻幾大洲

點解咁抵：買嘅係「總距離」

玩之前要知嘅規矩

點出票

睇真實例子：兩條現成線

常見問題

265,000 里，飛勻五大洲

逐站拆：去邊、玩乜

常見問題

250,000 里，完成人生 bucket list

逐站拆

常見問題

常見問題

逐站點玩

點解咁排

一次大額簽賬，就儲夠成條線

常見問題

逐站點玩

數口

常見問題

逐站點玩

常見問題

逐站點玩

常見問題

開口點玩（一個額換兩個城市）

其餘各站

常見問題

國泰8月1日起調高燃油附加費

香港出發・每航段收費對照（官方）

五樣嘢要知

「免費機票」其實要俾幾多錢？

YQ 到底係咩

點樣安全查實

環球票要特別留意

常見問題

官方迎新、抽獎、渠道賞唔好撈埋

加碼點砌

申請渠道逐項拆

張卡本身

常見問題

簽 $25,000，換到兩程亞洲來回

兩個入口，攞到嘅數唔同

仲有一筆 HK$200，但條件完全唔同

同上一期比

除咗迎新，日常都有嘢賺

攞盡佢，記住呢幾樣

張卡本身

常見問題

132 萬分，分兩段派足一年半

兩段式迎新，時間拉足一年半

第一段真正嘅價錢：$9,500 買 66 萬分